New Delhi, Naiwieng 03 : Ka kynhun ki Heh ka National People’s Party (NPP) kila hiar sha Nongbah Delhi bad iakynduh ia ki Heh ka Ministry of Home Affairs (MHA) ka Sorkar Pdeng, ban kyrpad ha kaban pynrung lang noh ia ka Ktien Garo ha ka thup ban ioh jingithuh noh hapoh ka khyrnit ba phra jong ka Riti Synshar ka Ri.
Kane ka Kynhun ka dei kaba la ialam da ka MP ka Lok Sabha na Tura Agatha Sangma ha ryngkat u Lamphang ka Iingdorbar Thaw Ain ka Jylla Thomas A Sangma, u Myntri Sorkar Marcuise N Marak bad kiwei kiwei.
Kine ki Heh ka NPP kila iakynduh ia u Secretary ka MHA ha New Delhi hynne ka step sngi Thohdieng bad ka jingiakren kala iaid halor ka jingpynrung lang noh ia ka ktien Garo ha ka thup kumba rung ka Ktien Khasi bad 37 tylli kiwei pat ki Ktien, ki ban sa ioh jingithuh noh hapoh ka Khyrnit ba phra jong ka Riti Synshar.
Ka jingthmu jong kane ka jingleit iakynduh ka long eh ha kaban pynthikna ba ka ktien Garo kan ioh lang noh ia ka jingithuh.
Ia kane la pyntip da u Myntri Rangbah ka Jylla Conrad K Sangma haba sam ia ka khubor lyngba ki rynsan Social Media.
A delegation of @nppmeghalaya leaders, led by Hon’ble Lok Sabha MP, Smti. Agatha Sangma, Hon’ble Speaker, Thomas A Sangma & Hon’ble Minister, Sh. @marcuisemarak met Secretary, Ministry of Home Affairs in New Delhi regarding inclusion of Garo Language in the list of demands for… pic.twitter.com/IaDoDPiJG9
— Conrad K Sangma (@SangmaConrad) November 3, 2023
Kane kala mih tang hadien katto katne sngi ba u President ka Garo Baptish Convention (GBD) ula pynpaw ia ka jingnsgew khia bad jingbym sngewtynnad halor ka jingbym rung ka ktiem Garo ha ka thup ki 38 tylli ki ktien ki ban sa pynrung noh ha ka Khyrnit ba phra kumba la pynbna da ka MHA dang shen.
Ki ktien kiba la don ha ka thup bad kiban dang ioh ia ka jingmynjur ki dei ka Ktien Khasi, Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar lane Gujjari, Ho, Kaachachhi, Kamtapuri, Karbi, Kodava (Coorg), Kok Barak, Kumaoni (Pahari) and Kurak.
Kiwei pat ki ktien ki dei ka Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri lane Kosali, Shaurseni (Prakrit), Siraiki, Tenyidi bad Tulu.
Ia mynta, ki don 22 tylli ki ktien kiba la rung ha ka khyrnit ba phra ka riti synshar ka ri bad kine ki dei ka Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu, bad Urdu.
