Hiar khynra Nongbylla bar jylla be-ain ka Tnad Labour bad KHADC ha Industrial Estate ha Umiam

Ym hun ka Dorbar Shnong Umiam ia ka rukom talasi ia ki kot ki sla

Nongpoh, Natung 22 : Ka Tnad Labour ka Sorkar Jylla bad ka Khasi Hills Autonomous District Council (KHADC), hynne ka sngi Nyngkong, kila hiar khynra ia ki nongbylla bar jylla ba wan bylla be-ain hapoh ki karkhana kiba don ha ka Industrial Estate ha Umiam.

Ia kine ki nongtrei ka Tnad Labour bad KHADC la synran da ki Pulit ka Umiam Police Station bad ka Tnad Infiltration ka Ri-Bhoi District nalor ki nongialam jong ka Shnong Umiam.

Haba kren sha ki nongthoh khubor, u Rangbah ka Shnong ka Umiam Bah Stevenson Kharkrang ula pyntip ba ki nongialam shnong kila shu leit synran ia ki Ophisar Sorkar hadien ka jingioh pdiang ia ka shithi na ka Tnad Labour namar ki nongialam shnong ki tip kham bha ia ka jinglong jingman ha ka thain.

U Bah Kharkrang ula pynpaw ia ka jingsngewkhia halor ka jingrung kyrthep ki nongbylla bar jylla hapoh ka thain bad kynnoh ba kane ka Industrial Estate kala kylla long ka jaka rieh jong ki riew bymman.

Ula pyntip ba ki bor Shnong ki ju iakynduh man ka por ia ki trai jong ki karkhana ha Industrial Estate bad bthah ia ki ba kin ai jingtip thik pa thik sha ki bor shnong ia ka jingwanrah nongbylla bar jylla nalor ban pynthikna ba ki nongtrei ki don ia ki kot ki slab a donkam kynthup ia ka jingpynshisha da ki Pulit na ki Jylla ba ki wan.

Halor ka jingkhynra, une u Nongialam Shnong ula pynpaw pat ia ka jingbym ihun ia ka rukom talasi ia ki kot ki sla jong ki spah ngut ki bar jylla kiba trei bylla ha ka thain.

U Bah Stevenson u pyntip ba namar kane, ka Dorbar Shnong kam banse ban shimkhia ia kane ka kam bad bthah ia ki trai karkhana ba kin pynbiang ia ki kot ki sla jong ki nongbylla ba kynthup naduh ka Labour Licence, Trading Licence, Police Verification hapoh ka 3 sngi lem kumta ka Dorbar Shnong kam banse ban shim pat da ki lad ba tyngeh pyrshah ia ki bar jylla ba wan bylla ha ka thain.