Mairang, Jylliew 20: Ka Ophis u Range Forest Officer, Mairang Range ryngkat ki Pulit, kila hiar khynra ia ki jaka thang rnga ba be-ain kiba don ha Eastern West Khasi Hills District bad ioh pynpra ia shibun bah ki thliew thang rnga ba be-ain.
Ia kane ka jingkhynra la pynlong ha ka 16 tarik mynta u bnai ha kylleng ki jaka jong ka District bad ka jingshem kaba bun eh ki thliew thang rnga ba beain ki dei kiba don ha ka thain Sohjarang bad Pathar Lyndan, kiba la thang rnga ban pynpoi sha ki karkhana kiba don ha Ri-Bhoi District.
Ki briew ka Tnad Forest bad ki Pulit kila pynpra lut ploin ia kine ki thliew thang rnga bad kurup ruh ia bun bah u rnga bala pyllang ha ki byrni ha kine ki jaka thang rnga.
Halor kane ka jingshem, ka Ophis kala kyntu ia ki Nongialam Shnong ka thain ba kin ai ka jingiatreilang bad ka Tnad Forest ha kaban tehlakam noh ia ka jingthang rnga namar ka jingwanrah ia ka jingjot ba shyrkhei ia ka mariang.
U Range Officer ula maham ruh ba lada ka Tnad Forest ka lap ia kino kino ki briew kiba thang rnga beain, ka tnad kan sa kem bad kan sa pynngat ia ki ha ki kyndon ba tyngeh jong ka Ain iada mariang.
Ula pyntip ryh b aka Ophis kan sa pynkhlain ia ki prokram ban leit pynshai paidbah halor kiba bun ki ain iada mariang bad kumjuh ruh ban pynsngewthuh ia ki jingma kiba ap na ka jingpynjot pynjulor ia ki khlaw ki btap.
