Shillong, Naiwieng 19 : Ka Directorate of Enforcement (ED) kala pynlong ia ka jingkhynra ha ki 22 tylli ki Iing ha Meghalaya bad 5 tylli kiwei ki Jylla halor ka jyrsieh Lottery u Santiago Martin.
Ka jingkhynra ka dei halor ka jingtohkit jong ka ED pyrshah ia u Santiago Martin bad ka kompani jong u ka M/s Future Gaming and Hotel Services Private Limited lem bad ki paralok ong u. Saw tylli ki Printing Press kiba don bynta ha ka jing shon ia ki lottery ticket ruh kila ngat lang ha ka jingkhynra.
Ka jingtohkit jong ka ED kala mih na ka ejahar bala ujor da ka Tnad Meghalaya Police halor ka jingujor jong u Director ka Meghalaya State Lottery. Ia kane ka case la shimti da ka CBI haba shim lang ia ka ejahar bala ujor da ki Pulit ka Kerela.
Kiwei pat ki Jylla kiba ka jingkhynra kala jia ka kynthup ha Tamil Nadu, West Bengal, Karnataka, Uttar Pradesh bad ka Punjab kaba long kat kum ka Prevention of Money Laundering Act (PMLA), 2002.
“Ka jingkynnoh kala mih ka kynthup ia ka jingkwah pyniaid marwei ia ka iew Lottery, ka jingdie ia ki ticket thok, ka jing pyniaid hala ka mon ia ka song pisa ba jop, bad jingpynkylla ia ka pisa beain (black money) sha ka pisa hok da kaba pyniaid ha ka price jong ka ticket. Kine ki kam kila wanrah ia ka jingduhnong kaba khraw ia ka pla tyngka ka Jylla bad ki paidbah” ong ka ED ha ka kyrwoh.
Ka jingkhynra kala lam sha ka jingioh kurup ia ka pisa bym lah ban batai, kaba kot haduh T.12.41 klur, bun ki tiar digital bad ki kot ki sla kiba donkam. La kurup ruh ia ka Bank FDR ba T.6.42 klur ha kane ka jingkhynra.
Ka ED kala shem ruh ia shibun bah ki jingkynshew ha ki nongkynti ha Coimbatore Chennai, Mumbai, Dubai bad London bad kiwei kiwei.
Ha ka jingtohkit ba nyngong ia kane ka kam ha ka ED, Kochi, la shem ba u Martin Santiago bad ka kompani jong u, kila ioh lum pisa beain haduh T.920 klur na ka kam lottery ha kaba haduh T.622 klur ka nongkynti la kurup noh.
Ka jingtohkit ia kane ka kam ka dang iaid shakhmat.
 kala pynlong ia ka jingkhynra ha ki 22 tylli ki Iing ha Meghalaya bad 5 tylli kiwei ki Jylla halor ka jyrsieh Lottery u Santiago Martin.){kind=link}