Shillong, Lber 31 : Ka Khasi Students Union (KSU)-Mawprem Circle hynne ka sngi U Blei, kala leit ban khang khyrdep ia ki Bank kiba don ha ka thain, namar ka jingpynlong trei ha kane ka sngi kyntang jong ki paid riewngeit Khristan kaba la tip kum ka Easter Sunday.
Ka KSU hapoh ka jingialam u Organising Secretary samla Banshan Lyngdoh, kala lap ba baroh ki bank kila pynlong trei khlem da burom shuh ia kane ka sngi khuid, sngi kyntang jong ki riew ngeit Khristan hapoh ka Bri u Hynniewtrep.
Halor kane ka jingshem, ka KSU kala phah khang mardor ia ki baroh ki bank bad hukum ba kim dei ban ialeh pyrshah ne khein dewthala ia baroh ki sngi kyrpang jong ki kynhun niam kiba ki Khun Hynniewtrep ki mane bad bud.
Ha kajuh ka por, ka KSU ka pynpaw ia ka jingbitar halor ka jingkynnoh leh bym suitniew ka Sorkar Jylla bad Sorkar India ban ai shuti ha kane ka sngi Kyntang bad sngi Khuid jong ki paid riew ngeit Khristan.
Kala ong ba ha kiwei ki jylla kum ka Manipur, Mizoram bad kiwei ki jylla shatei sha thaiñ lam mihngi ki ioh shuti ha kum kane ka sngi kyrpang khlem da ai daw ia kata ka Financial year.
Kyntang iawai ka KSU ka kren da kaba shai sha baroh ki Banks bad ki Financial Institutions ba kim dei ban kheiñ dew thala ia ki sngi kyrpang u Hynñiewtrep bad ia ki sngi kyntang jong ki Khristan khun Hynñiewtrep bad kiba leh pyrshah ia kane ka Seng kan dang iai mih madan ban ai shuti hi da kaba khang da ka bor.
