Imphal, Naitung 19: Ka kynhun ba 5 ngut jong ki Nongialam ka Trinamool Congree kila poi ha Manipur ban iakynduh bad sngap ia baroh ki Jaidbynriew ka Jylla kiba la shah ktah na ka jingkhie ka thma iapher Jaidbynriew, kaba la sdang naduh ka 3 tarik u Jymmang.
Kane ka Kynhun kan leit iuhkjat nyngkong eh ha Churachandpur da ka helicopter bad ha ka janmiet pat kan leit sha ki jaka lum jong ka Imphal kiba shah ktah jur ha kane ka thma iapher jaidbynriew, pyntip ki Nongialam ka TMC.
Kane ka kynhun ka kynthup ia u MP ka Rajya Sabha Derek O’Brien, MP ka Rajya Sabha Dola Sen bad Sushmita Dev bad MP ka Lok Sabha Kakoli Ghosh Dastidar bad Kalyan Banerjee.
Haba iakren bad ki nongthoh khubor, ka Nongialam ka TMC Sushmita Dev kala ong “Ka long kaba sngewsih ba u Myntri Rangbadh Duh ka Ri Narendra Modi ha ka elekshon MLA bala lah, ula ong ba ka jingsuk ka dei ka daw bah ban jied ia ka BJP. Hynrei mynta pat la pyni ba ka BJP ha Delhi bad ha Jylla kim shym la lah ban tehlakam ia ki kam iaumsnam ha Manipur”.
“Nga la iohi ba ki nongshongshnong ka Manipur kila riehtngen ha ki jaka sah ba shipor ha Silchar. Ngi la iohi da ki hajar ngut ki briew kila sah ha ki jaka sah ba shipor bad ngin sa leit ban jngoh ia baroh kine ki jaka sah” kala ong.
Ka Sushmita ka ong “Hadien ka jingbthah jong ka Mamata Banerjee, ngi la wan ban iuhkjat ha Manipur ban sngap ia ki jingeh jong ki jaidbynriew bapher bapher. Ngin sa leit jngoh ia ki jaka sah ba shipor bad ngin sngap ia ki jingeh jong ki briew ba kylla phetwir”.
Ka Trinamool Congress kala kynnoh baka polici ban pyniapait iapra jong ka Sorkar ba ialam da ka BJP ha Delhi bad ha Manipur, ka dei kaba wanrah ia kane ka thma iapher jaidbynriew.
Kane ka kynhun ka TMC kala dei ban leit iuhkjat sha Manipur ha ka taiew bala lah hynrei kala rai ban pynjlan tad haduh ka 19 tarik Naitung hadien ka jingkyrpad jong ka Sorkar Manipur.
Pule ruh: Ri Bhoi District Police seize gold worth 35 Lakh, Volkswagen; 3 held
