Nongpoh, Naitung 03 : Ka Executive Committee ba thymmai ka Khasi Hills Autonomous District Council (KHADC) hynne ka sngi Nyngkong, kila hiar jurip sha Block-II, kaba don hapdeng ka jingiakajia pud bad ka Assam bad iakynduh ruh ia ki Nongmihkhmat ka Karbi Anglong Autonomous Council (KACC) ban pynneh ia ka jingshongsuk shongsain ki paidbah ha ki Shnong ka thain.
Kane ka kynhun na KHADC ka dei kaba la lamkhmat da u Chief Executive Member (CEM) Bah Pyniaid Sing Syiem bad u DyCEM Bah Pynshngain N Syiem, u Chairman ka Council Bah Lamphrang Blah bad katto katne ngut ki EM nalor u MLA/MDC ka Mawhati uba dei ruh u DyChairman ka Council Bah Charles Marngar.
Ka kynhun ba wan mihkhmat na ka Karbi Anglong Autonomous Council (KAAC) ka dei kaba la ialam da u Avijit Kro uba dei u MAC ka Chinthong Constituency. Ha kane ka jingialang la iadonlang ruh ki Nongialam ka Synjuk ki Rangbah Shnong ka Border Area, u Syiem Khynnah ka Raid Nongtung lem bad ki Rangbah Shnong.
Kane ka jingialang kala iatai sani kumno ban wanrah ia ka jingshongsuk shongsain hapdeng ki paid Khasi bad ki Karbi ha Block-II bad ban iatreilang ruh n aka bynta ka bha ka miat ki nongshongshnong jong kane ka Thain. Kala iasyllok ruh halor ka jingpyntreikam ia ki kam pynroi pynpar ha ka thain ba kam dei ban don ka jingpynthut la ka dei ka kam pynroi ba wanrah na Meghalaya ne na Assam ruh kumjuh.
Haba iakren bad u CEM ka KHADC, ula pyntip ba ka jingiakynduh bad ki bor ka KAAC ka dei eh ban iakren bad iatai sani halor ki jingeh bala mad da ki nongshongshnong ka Raid Nongtung khamtam ki Nongrep kiba ju shah pyndik na ka por sah ka por ha ki bor ka Sorkar Assam.
Ka jingialang kala iakren ruh halor ki kam iapynbeit pud hapdeng ki artylli ki Sorkar Jylla-ka Sorkar Meghalaya bad Assam bad ban ai ka jingiatreilang bad ka Sorkar ha kaban lah pynbeit noh ia u pud u sam ba thikna jong ki ar jylla.
“Kum ki Dkhot jong ki Regional Committee ha ka jingiakren pynbeit pud jong ka wat kaba ar, ngi la hiar jurip ia ki shnong ha Raid Nongtung bad iakynduh ruh ia ki paid Nongshongshnong. Ngin sa phah ia ka kaiphod jong ngi sha ki Regional Commmittee ban pynshong nongrim ha ka jingiakren pynbeit pud ka ban sa long shen” ula ong.
U CEM ka KHADC ula pyntip ruh ba ka EC jong ka Council kala ai mynsiem ia ki paidbah ka thain Raid Nongtung ba kin nym duh jingkyrmen ia ka jingiapynbeit pud hapdeng ka Sorkar Meghalaya bad ka Assam.
Hashuwa kane, kane ka kynhun na KHADC kala leit ruh ban jurip ia ka jaka lehniam bad ka jaka tep ia ki mawshyieng lane u Mawbah jong ki 12 Kur kaba don ha ka shnong Ummat.
“Ngi wan jurip ia kane ka jaka namar ngi sngew ba ka long kaba kongsan ban pynneh pynsah ia katei ka jaka lehniam ki 12 kur ka Raid Nongtung” ong u Bah Pyniaid.
U pyntip ba ka EC jong ka KHADC kan sa shimkhia bha ia kane ka kam bad kan sa shong pyrkhat ruh ban shim ia ka rai kumno ba kan lah pynmang pisa ha kaban kyntiew bad pynneh pynsah ia kane ka jaka lehniam jong u menbarim na ki 12 Kur ka Raid Nongtung.
Pule ruh: Kynnoh ka KSU ba khlem larkam ka ANTF ban iakhun pyrshah ia u droks ha SWKH
 hynne ka sngi Nyngkong, kila hiar jurip sha Block-II, kaba don hapdeng ka jingiakajia pud bad ka Assam bad iakynduh ruh ia ki Nongmihkhmat ka Karbi Anglong Autonomous Council (KACC) ban pynneh ia ka jingshongsuk shongsain ki paidbah ha ki Shnong ka thain.){kind=link}