Shillong, Lber 10: U Myntri Rangbah ka jylla u Conrad K Sangma hynne ka sngi Nyngkong ula pyntip ba ka sorkar jylla kala lah ban pynhiar iaka jingkhlad jong ki longkmie kiba punkhun ne ka Maternity Mortality Rate (MMR) da 40 percent.
Haba jubab halor ka jingai shuti ia ki longkmie kiba punkhun, u Conrad Sangma ula ong ba ka MMR kadei kawei na ki mat kaba ka sorkar MDA-I kala shimkhia bha naduh u snem 2018.
“Ha katei ka por, ka MMR kala long arshah ia ka jingling jingman hapoh ka ri ha ki hynriew snem kiba la leit. Da ka jingshimkhia ha ki kyrdan bapher bapher, la lah ban pynhiar ia ka MMR da 40%. Ngi mynta ngi lah iaid bad ka jingling jingman ha ka ri” ula ong.
Hashwa kane, u Myntri Rangbah ula pyntip ba na ka bynta ki nongtrei kam sorkar kiba pura, la khmih ia ki katkum ka Subsidiary Rule 111 jongka Meghaalya Fundamenta Rules & Subsidiary Rules, 1984 (kumba la pynkylla).
Ki longkmie kiba punkhun kila ioh iaka shuthi kaba 120 sngi kiba don pat ym duna ia arngut ki khun. Hynrei lada jia ba i khunlung i khlad noh hapoh kpoh ne kaba la tip kum ka Stillborn Delivery, lah ban ai shuti shuh shuh ban ia katei kaba la kdew haneng.
Kumba long la ai shuti shwa 90 sngi kaba la treikam naduh ka 14 tarik u Rymphang 1984 haduh ka 22 tarik u Nohprah 2009. Hadien la kyntiew noh na ka 90 sngi sha ka 120 sngi naduh ka 23 tarik u Nohprah 2009 haduh ka 7 tarik u Nohprah 2017. Hadien kane la kyntiew noh na ka 120 sngi sha ka 180 sngi naduh ka 8 tarik u Nohprah 2017, ula ong.
Na ka bynta ki karkhana shimet, u Myntri Rangbah ula ong ba kila hap hapoh ka jingpyniaid katkum ka Maternity Benefit (Amendment) Act, 2017.
Ka por jong ka jingai shuti ia kiba punkhun ryngkat bad ka jingioh iaka tulop ka long 12 taiew haduh 26 taiew.
Lah ban kdew ba baroh ki karkhana jong ki riewshimet ne kiba pyniaid da ka sorkar ki hap ha katei ka Maternity Benefit Act.
“Kano kano ka longkmie ka lah ban ioh ia ka bai kha khun ne Maternity Benefit, tang lada ka trei ha ki jaka jong kiba aikam kiba lah kam ia ka bai kha khun, na ka bynta ka por ia kaba kam dei ban duna ia ka 8 sngi ha u bnai uba 12 mardor kaban long shwa ia ki sngi kaba kadei ban kha ia i khunlung” ula ong.
Nalor kane, ula ong namar ba ki ain jong ka sorkar kim kynthup ia ki nongtrei ki bym pura, Casual, Contractual, Adhoc bad Muster Roll, ki lah ban ioh iaka Maternity Leave hapoh jongka Maternity Benefit (Amendment) Act 2017, kaba dei ka jingpynkylla thymmai ia ka “The Maternity Benefit Act, 1961”
 da 40 percent.){kind=link}