Shillong, Nailar 07 : U Myntri ka tnad Pule Puthi Rakkam A Sangma ha ka sngi Balang ula pyntip ba ka Sorkar kala pyn khreh shaid shaid ha kaban pynlong ia ka Shillong Engineering College, kaba dei kaba nyngkong eh ha Jylla, ba kan treikam noh kham kloi kat kaba lah.
Haba iakren bad ki nongthoh khubor hadien ka jingjurip, u Rakkam ula ong “Ka jingtei ia ka building kala dep lut bad ki kam kila iaid mynta ban lah pyntreikam noh ia ka”.
“Hynrei namar ki katto katne ki jingpynsngew na ka AICTE, ngim shym la lah ban pyntreikam noh mar mar. Ka jingpyn sngew na ka AICTE ka long ba ka dei ban don la ka jong ka Administrative Building. Kumta, ngi dang thmu ban shna ia ka Administrative Building la ka jong. Ngi kyrmen ba kane ka Engineering College kan treikam noh kham kloi” ula ong.
U Myntri ula ong ba ka Sorkar ka khmih lynti ban pynsdang shuwa da ki katto katne ki course ha ka Shillong Engineering College ha u snem pule ban wan. Ka College kan don haduh 5 tylli ki shnat-ka Civil Engineering, Mining, Mechanical, Electrical bad Computer Sciences.
“Kane kan dei ka Engineering College ba nyngkong eh ha Jylla bad ngi dang pynbiang lut ia ki jingdonkam mynta bad ngin sa thung ruh ia ki nonghikai bad ki nongtrei kham kloi katba lah. Hynrei baroh kine kiei kiei kin iaid kat kum ka jingbuh kyndon jong ka AICTE” ula bynrap.
