Hiar jurip u Myntri ia ka Myntdu Leshka Project, bishar iaka jingtreikam bad ki kam maramot

Shillong, Jymmang 03 : U Myntri ka tnad bording Abu Taher Mondal, ha ka sngi Palei, ula hiar jurip ia ka Myntdu Leshka Hydro Project bad shong bishar kam ruh halor ka rukom treikam bad ki jing maramot bad jingpynkhlain ia ka project.

Ia u Myntri la synran da u Director Generation ka Meghalaya Power Generation Corporation Ltd (MePGCL) R Majaw bad kiwei kiwei ki Engineer bala san bha ha ka kam na ka MePGCL.

Ka jingleit jurip ka dei eh halor ka jingshong bishar kam halor ka jingpynmih bording ba mynta jong kane ka project bad ban leh eiei halor ki jingeh kiba mih na ka jingtreikam jong ka project. Kala mih ruh ka jingiakren halor ka jingiaid ki kam maramot jong ka Unit-I, kaba la khmih lynti ba kan ai biang ia ka jingshakri hapoh ka 15 tarik Jylliew, 2024.

Kawei ka mat kaba wanrah ha kane ka jingialang bishar kam ka dei ka jingduna ka mobile network connectivity hapoh ka Power House. La tyrwa ban pyndonkam noh da ki VHF ban pynbiang ia ki lad pyniasoh hapdeng ka Damsite bad ka Power House.

U Abu Taher Mondal ula shim ruh ka kabu ban leit jngoh ia ka Damsite bad jurip ia ki kam ba dang iaid kum shibynta jong ka Dam Rehabilitation and Improvement Project (DRIP).
U Myntri ula ban jur halor ka jingkongsan ban trei met bad mynsiem bad ka jingtrei janai jong ka M’S Multi Tech Engineers, ka kompani kaba la aiti ban pyndep ia ka project.