Shillong, Naitung 31 : Ka Jylla Meghalaya kala pynkhreh shaid shaid ban pynlong ia ka lympung ialehkai phutbol barim duh ka dewbah Asia bala tip kum ka Durand Cup, 2024, kaban dei ruh ka lympung bala pynlong ha ka sien ba nyngkong eh ha Jylla, ka ban sdang naduh ka 2 tarik Nailar ha JN Stadium, Shillong.
U Myntri ka Tnad ialehkai ka Jylla Bah Shaklia Warjri, ula leit ban jurip ia ka jingpynkhreh ha kane ka madan hynne ka sngi Balang bad pynpaw ia ka jingsngewhun ia ka rukom iaid ki kam ki jam. Ula pynpaw ba kumba long mynta, haduh 98% ki jingpynkhreh kila dep.
Ia u Myntru la synran da ki ophisar ka tnad Sports, ki nongïalam ka Meghalaya Football Association, kiba mih khmat ia ka Durand Cup Organizing Committee nalor kiwei pat.
Ka lympung hangne ha Shillong kan sdang da ka jingialehkai hapdeng ka Shillong Lajong pyrshah ia ka Tribhuvan Army Football Club, ka ban sdang ha ka por 4 baje janmiet jong ka 2 tarik Nailar.
U Myntri ula ai ka jingkular ba baroh kiei kiei kin sa biang lut nadong hadong ha ka sngi plie ia ka lympung bad pynshlur ia ki riew ieid phutbol ba kin wan bad kyrshan iala ki jong ki kynhun.
Ka Shillong kan ioh ban pynlong haduh 6 tylli ki jingialehkai jong ka Durand Cup.
