Shillong Risaw 06: U Myntri ka sorkar jylla u Rakkam A. Sangma bad u MLA ka Chokpot u Sengchim N. Sangma hynne ka sngi u Blei, kila leit sngewlem bad iakynduh ia ki bahaiing bahasem jong kawei ka longiing kaba la duh noh ia 7 ngut ki mynsiem briew na ka jingshah tap ha ka khyndew kaba la twa kynsan.
Katei ka jingjia kaba sngewsih kala jia haka shnong Hatiasia Songma, South Garo Hills District ha ka por 7 baje mynstep ha ka 4 tarik mynta u bnai.
U Myntri Sorkar bad u MLA kila leit jurip ia katei ka jaka bad kila pynpaw iaka jingsngewlem sha ki bahaiing bahsem bad kila iakren ruh bad kia kynhun NDRF.
La iathuh ba namar ka jingtwa kynsan jong ka khyndew baroh kiba don ha katei ka iing kila khlad noh naka jingshah tap ha ka khyndew ha kaba tang ia katnum iing ruh ym lah ban iohi shuh.
Ki 7 ngut kiba la khlad noh ki kynthup iaka Silji R Marak (60 snem), ka Merina R Marak (39 snem), u Sama N. Sangma (50 snem), ka Chengbe R Marak (22 snem), u Desrang R Marak (14 snem), ka Silbera R Marak (8 snem) bad i Dimse R Marak iba dang don shi snem shiteng.
