Angnud ban pynkylla Fish Sanctuary ha kiba bun ki bynta ka Wah Umiam
Nongpoh, Naiwieng 05 : U MLA ka Mawhati Bah Charles Marngar, ha ka sngi Thohdieng, ula hiar jurip ia kawei ka jaka jong ka Wah Umiam, kaba don ha ka thain Tyrso, Ri-Bhoi District, da ka jingangnud ban pynkylla ia ka kum kawei na ki jaka jngohkai pyrthei ha ka thain.
Ia u Bah Charles la synran da u MLA ka Umsning Dr Celestine Lyngdoh, u Deputy Commissioner Abhilash Baranwal bad kiwei kiwei.
Ia kane ka jingjurip la pynlong hadien ka jingplie paidbah ia ka tamasa Amur Falcon kaba long ha Umtnam, Ri-Bhoi.
Haba kren sha ki lad pathai khubor, u Bah Charles ula pynpaw ia ka jingangnud ban pynlong ia ki katto katne ki bynta jong ka Wah Umiam kum ki Fish Sanctuary bad ruh ki jaka ia kienglieng.
Kum u MLA, ula pyntip ba ha Mawhati constituency, ki don ruh shibun ki jaka ha ki shnong bapher bapher ka constituency kiba don ia ki jaka jngohkai pyrthei.
“Ka jingdon jong ki krem, ki kshaid, ki mawksing ha ka shnong Mawrathud bad ka jinglong jingman jong ka mei mariang ha kane ka thaiñ, ka don jingkyrmen shikatdei eh ban pynkylla ia kane ka thain kum ka jaka jngohkai pyrthei kaba paka nalor ka jing aikam aijam ruh ia ki paidbah kane ka thaiñ”, ong u Bah Charles.
