Shillong, Iaiong 19 : U Myntri Rangbah ka Jylla Conrad K Sangma hynne ka sngi Balang, ula leit ban jurip ia ki madan ialehkai phutbol ba dang pyntrei pynbha ha Polo kynthup ia ka madan First Ground, Indoor Stadium bad ka JN Sports Complex.
In our effort to nurture sporting talents, Government has also made the move to identify locality fields in collaboration with the community to upgrade the grounds into astroturf. Survey around Shillong city has been initiated.@ianuragthakur
— Conrad K Sangma (@SangmaConrad) April 19, 2023
Lah ban kdew hangne ba ka Sorkar Jylla kala bhah haduh T. 34. 5 klur ka pisa ban shna pynbha ia ki stadium ha Polo. Ia u Myntri Rangbah la synran da ki Ophisar ka Tnad Sports, ki Engineer ka State Sports Council, ki nongkitkam ka Meghalaya Football Association lem bad kiwei kiwei.
U Myntri Rangbah ula hiar jurip nyngkong ia ka madan First Ground kaba dang don hapdeng ka jingmaramot bad jing pynbha ban pynlong kum kawei na ki madan ialehkai kaba biang pura hapoh ka Jylla. Ka jingsiang ia u phlang plastic (astro turf) ka dang iaid shakhmat.
U Myntri Rangbah haba iakren bad ki lad pathai khubor ula ong “Ka jingsiang ia u astro turf kala sdang ha kane ka madan First ground bad la khmih lynti ban pyndep noh ia ka hapoh u bnai Naitung. Kan don ruh ka jingshna thymmai iaki jaka shong peitkai”.
“Ka Sorkar kala rai ruh ban phaikhmat sha kiwei ki madan ialehkai jong ki shnong, ki sor kaba don ia ki samla ba ialehkai phutbol bad ryngkat ka jingiatreilang bad ki Dorbar Shnong bad ki Nongmihkhmat, ngi kwah ban kyntiew kyrdan ia kine ki madan ialehkai” ula bynrap
U Myntri Rangbah ula pyntip ruh “ Tang ha sor Shillong, ngi la ithuh haduh san tylli ki madan ba ngin siang astro turf ia kaba la khmih lynti ba ki kam ki jam kin sa sdang noh shen” haba bynrap “Ngi khmih lynti ban don noh bun ki madan astro turf khnang ba ki samla jong ngi kin ioh ban ialehkai bad ban sei ruh ia ki sap”.
Haba phai sha ka madan JN Sports Complex, u Myntri Rangbah u pyntip ba ia kane ka madan yn pynkylla noh sha ka Natural turf ne da u phlang shisha. U pyntip ba kala don ka jingshna thymmai ia ki jaka shongkai ki ban pynbun ia ka jaka shong ia ki nongwan peitkai kaban long kumba 30000 ngut.
“Ngin iaid kat kum ki kyndon bala buh ka FIFA bad kane ka stadium khamtam ka madan ialehkai kan long kaba iaryngkat kyrdan bad ki madan ialehkai ki ri ka pyrthei” ong u Conrad haba pyntip ba ka jingshna thymmai kan long ruh ia ka race track bad kiwei kiwei.
“Ngi dei ban pyndep noh ia kane ka madan ialehkai (JN Sport Complex) hapoh une u snem ba mynta (Naiwieng) bad ngi la khmih lynti ban lah pyndep hapoh u bnai Naiwieng ne ka taiew ba nyngkong u Nohprah 2023” ula bynrap.
Khatduh u Myntri Rangbah ula leit jurip ia ka jingtrei pynheh ia ka Indoor Stadium kaba don mar syndah ki madan ialehkai phutbol bad ong ba kane ka Multi Purpose stadium ynda la dep pyntrei, kan dei kaba heh duh na ki Indoor Stadium ha poh ka thain Shatei Lam Mihngi ka Ri.
The Multipurpose Indoor Stadium in Polo Grounds will be the largest in the North East.
The infra being developed in & around the J N Stadium vicinity will host multi-disciplinary sport events & will be a huge encouragement for our youth@ianuragthakur pic.twitter.com/jBr2dHSu1s
— Conrad K Sangma (@SangmaConrad) April 19, 2023
U pyntip ba ha kane ka Indoor Stadium kan don baroh ki jaka ialehkai naduh ki basketball, squash, badminton, hall ia ka table tennis bad kiwei kiwei.
U ong ba da ka jingpyndep ia kine ki lai tylli ki jaka ialehkai, ka Jylla kan sa lah ban pynlong ia kiba bun ki lympung ialehkai kynthup ia ka National bad International Level.
