Shillong, Jymmang 17 : U Myntri Rangbah ka Jylla Conrad K Sangma ha ka sngi Saitjain ula hiar jurip ia ka jaka ban tei iaka Living Root Bridge Experience Centre ha ka shnong Wahlyngkhat kaba hap hapoh ka Pynursla Sub Division, East Khasi Hills.
Ia kane ka Centre la tei ha ka jinglut kaba kot T.70 klur, k aka kynthup ia ka Living Root Bridge Experience Centre bad ka Wahkhen Residential Music Retreat.
Kum shibynta jong ka project,ka Sorkar kan pynroi ia ka shnong Mawkyrnot, Rangthylliang bad Mynrieng bad yn pyniasoh ia ki sha ka trekking circuit (jaka iaid kjat) bad kiwei pat ki jingtei ba donkam ha ki kam jngohkai.
U Conrad ula ong ba ia kane ka jaka la jied namar ka jingdon bun eh ki Jingkieng Jri ha Wahlyngkhat.
Ula ong ba ka Wahkhen Residential Music Retreat kan ailad ia ki nongshangkai ba kin ngam jyllip ha ka lehniam lehrukom kaba riewspah jong ka Jaidbynriew Khasi.
“Ka Living Root Bridge Experience Centre kan sa mih hangne ha Wahlyngkhat. Ka daw balei ba ngi jied ia kane ka aka ka long namar ka jingdon bun eh ki jingkieng jri, kynthup ia kawei kaba don hajrong eh ha ka thain bad ka Jylla baroh kawei. Lyngba kane ka centre, ki nongshangkai, kiba wan kai, kin lah ban sngewthuh ia ka kolshor ba pura,ka histori, ki buit treikam bad ki jaka bapher bapher kiba don ia ki jingkieng jri, ka ban pynlong kyrpang ia ka jingshem jong ki nongshangkai. Ka dei ka project kaba kongsan bha ia ngi” ong u Conrad.
Ula bynrap “Nalor kane, ka jaka iaid kjat ba pura hangne kan long kawei pat ka jingmad ba kyrpang ia ki nongsahngkai. Ha kane ka jaka iaid kjat, ka don ha Shnong Wahkhen kaba iatip ia ka jingriew spah ha ka put ka tem nala tynrai, ngin sa buh ia ka music centre, ha kaba ki briew ki lah ban leit bad shim ia ki jinghikai bad kiwei kiwei”.
Halor ka jingleit iuhkjat ha ka Law Kyntang ha ka thain Raid Nongblai, u Myntri Rangbah ula ong “Ka kham rben ban ia kiwei pat ki khlaw kyntang kiba nga la iohi. Ka dei ka jingshem kaba khraw ha nga bad shisha ka rukom pynneh pynsah jong ki trai shnong ia kane ka khlaw, ka dei kaei kaei kaba ngi itynnad eh bad ngi la wan shane ban peit kumno ba ngin lah ban kyntiew ia ka thain baroh kawei”.
