Shillong, Nailar 02 : U MLA ka South Shillong Bah Sanbor Shullai, hynne ka sngi, ula hiar jurip kynsan kynsan ia ka surok ba dang shna na khydop ka Assembly, Rilbong kaba mih sha Umshyrpi, ban pynthikna ba u Contractor u shimkhia bad pyndep ia ka kam hapoh ka po kaba la buh.
Ia u Bah Sanbor la synran lang da ki Rangbah Shnong bad ki Nongkitkam Shnong jong ki phra tylli ki Dorbar Shnong kiba hap hapoh ka Raid Laban, ha ryngkat ka jingiadonlang ki OPhisar na ka Tnad PWD bad kiwei kiwei.
Ka jingjurip kala sdang najan ka khyrdop ka Assembly bad iaid ter ter shaduh shajan jong ka Quarter jong ki Pulit CID. Ha ka jingjurip la lap ba ki kam kila iaid shaid shaid bad ka jingpynheh ia ka surok ruh kala sdang. La kyrmen skhem ba da ka jingailad ka mariang, kane ka surok kan sa dep noh kham kloi.
Hadien kane, u Bah Sanbor ula leit jurip ruh sa ia kawei ka surok kaba don hajan ka Ophis u Shillong Times bad iaid ter ter shaduh sha surok bah jong ka Umshyrpi.
Haba kren sha ki lad pathai khubor, u Bah Sanbor u pyntip ba ia kane ka surok la mang ha ka jinglut kaba kot T. 6 klur tam bad la buhpor ban pyndep ia ka ha u bnai Kyllalyngkot 2026.
“Ynda dep kane ka surok, ki nongshongshnong jong ki phra tylli ki Dorbar Shnong ka Raid Laban bad kumjuh ruh ki paidbah na kiwei ki shnong, ki lah ban pyndonkam ia kane ka surok ha ka leit ka wan” ula ong.
Une u MLA ula ai khublei ia ka Sorkar MDA-I bad II kaba la shimkhia ban pynioh jaka na ka Tnad Arts & Culture na ka bynta ban shna ia kane ka surok ba pyniasoh ia ka surok bah ha Umshyrpi.
