Boko, Lber 19 : U Deputy Commissioner ka Kamrup Deba Kumar Mishra ha ryngkat ka Deputy Commissioner ka West Khasi Hills Hema Nayak, ha ka sngi Palei, kila hiar jurip sha ki jaka khappud ka Assam-Meghalaya ha Langpih (Lumpi) ban ia bishar kam halor ka jingpynkhreh ia ka elekshon ban wan jong ka Iingdorbar Thaw Ain ka Assam.
Ha kane ka jingjurip la iadonlang ki heh ophisar ba kynthup ia ki Superintendent of Police ka Kamrup Subhashish Baruah, Superintendent of Police ka West Khasi Hills Herbert Pyniaid Kharkongor, u Chief Executive Office ka Kamrup Zila Parishad nalor kiwei kiwei ki Heh Ophisar.
La pynlong ruh ia ka jingialang ha Lower Lumpi ha ka jingiadonlang ki trai shnong ban pynthikna ia ka elekshon kaba iaid beit iaid ryntih bad kaba suk ba sain ha ki polling station kane ka shnong khappud.
Ka jingiakren kala pynleit jingmut eh halor ka jinglah pyniaid beit ia ka jingiathep vote, ka jingpynbeit ia ki bor pahara, bad ka jingpynsuk ia ki nongthep vote na baroh arliang khappud. Lah iakren kyrpang halor ka jingpynthikna ba ki nongthep vote na Lumpi bad ki jaka ba marjan kin lah ban thep ia ki vote jong ki khlem ka jingshah pynwit, da ka jingiatreilang hapdeng ki bor district na baroh arliang.
Lah ban kdew hangne ba kane ka dei ka kylla kaba ar ha ka jingiakren hapdeng ki bor pyniaid ka Kamrup Rural bad ka West Khasi Hills, kaba nyngkong ka dei kaba la pynlong ha Ri-Bhoi.
U DC Mishra ula pynpaw ba ki jaka khappud ka Kamrup District ki dei kiba don markhap ka Ri-Bhoi bad West Khasi Hills District bad kumta ka jingiatreilang ka long kaba donkam ban lah pyniaid beit ia ka elekshon.
U pyntip ba ki don haduh 15 tylli ki Polling Station ha ki jaka khappud ba kynthup ia ka Lumpi, Gamerimura, bad Ukiam, kiba hap hapoh ka Boko‑Chaygaon bad Palashbari constituencies.
Ka DC ka West Khasi Hills Hema Nayak kala pynpaw ba ka jingialang ha Lumpi ka dei kaba la pynlong da ka jingthmu ban pynbiang ia ki jingdonkam baroh ha ka jingpynkhreh ia ka elekshon bad ka jingiatreilang, ka ba la pynthikna ia ka elekshon kaba iaid beit iaid ryntih ha baroh kine ki snem bala leit noh.
 ban ia bishar kam halor ka jingpynkhreh ia ka elekshon ban wan jong ka Iingdorbar Thaw Ain ka Assam.){kind=link}