Shillong Naitung 03: Ka Myntri Sorkar ka jylla ka Kong Ampareen Lyngdoh kaba long ruh ka MLA jongka East Shillong Constituency, hynne ka Lah Sngi u Blei kala leit jurip iaka jingtei iaka Smart City Project ha Lower Lachmiere, Shillong hadien ba kala ioh pdiang iaka jingujor halor ka jingur ki khynnah skul namar ka jingbym dep shna shuh iaka surok ha kane ka thaiñ.
Ka Kong Ampareen kala ong ba kala iohpdiang iaka jingujor na ki bor pyniaid jong ka All Saints Dicesan Higher Secondary School bad na ki kmie ki kpa jong ki khynnah skul halor ka jingur ki khynnah namar ka jingshna iaka jingkieng iaid kjat da ka Plywood halor ka projek Smart City ha katei ka jaka.
“Kila ud shi ud bad mynta ngi la wan jurip ha ka por ba kane ka skul ka dang ioh shuti bad ka don ka kynroh jong ka skul All Saints ruh kaba la sdang ban pra bad ngan pynthikna ba dei ban ai jingiarap na ka bynta ban pynbha biang ia katei ka kynroh na ka bynta ka jingshngain jong baroh” ong ka Kong Ampareen.
Kala ong, ba kala bthah ba dei ban shna noh iaka jingkieng kaba shngain na ka bynta ki khynnah skul bad ki nongleit nongwan khnang ba kin ym syntuid ne ur bad kane kan shim por kumba 3 taiew eiei bad kala ong ba kan sa wan ban jurip biang ia kane ka jingtei hadien 3 taiew.
“Ka jingbym lah ban shna pyndep ia kane ka projek kala buh ha ka jingeh ym tang ia ki nongleit nongwan hynrei kala pynmih ruh ia ka jingdheng kali bad ha ka jingjurip, nga la bthah ia ki kontraktor ba kidei ban shna iaka lynti iaid da kaba shngain ia ki paidbah bad ia ki khynnah skul bad nga la bthah ruh ban mang jaka lem na ka bynta ban ieng kali na ka bynta kiba wan shaw ia ki khynnah kiba pule ha ka All Saints School” ong ka Kong Ampareen.
Kala ong, ba ha ka wat kaba nyngkong la sdang ia ka projek ha ka bynta kaba sha lyndet jong ka ophis treikam MPSC bad ka wat kaba ar jong kane ka projek kan sdang ha ka surok kaba don hakhmat jong kane ka ophis, hynrei ia mynta la pahah ban pynsangeh noh shwa katba ym pat pyndep shwa iaka projek ha ka wat kaba nyngkong namar kan sa pynmih iaka kynrum kynram ne ban buh ha ka jingeh ia u paidbah.
Ha kaba iadei bad ka jingsuki ban shna ia kane ka projek, ka Kong Ampareen kala ong, ba ka dawbah kadei namar ba ki don bun palat ki tnad kiba kynthup iaka PHE, BSNL bad PWD kiba treikam bad pyndonkam ia kane ka surok bad la khmih lynti ba ia kane ka projek dei ban pyndep noh ha u bnai Risaw mynta u snem.
Ka jingslem ban shna pyndep ia kane ka projek kadei namar ka jingap iaka tnad PHE bad ka BSNL ba kin pyniaid ryntih ia ki pipe um bad ia ki wire ki jongki bad ynda la dep ia kane yn sa tap noh ia kane ka surok, hynrei kumba long haduh mynta kam pat don satia kano kano ka jingpyniaid ia ki pipe um ne ia ki wire na ki nala kiba la shna kyrpang lyngba ka Smart City Project.
Ha katei ka jingjurip la iadonlang ki heh jong ka Smart City Project, ki heh ophisar bad Engineer naka tnad Urban Affairs, PHE, PWD bad BSNL.
Pule ruh: Hiar ka KHADC sha Block-II, tyrwa iatreilang bad ka KAAC ban pynneh ia ka jingsuk ha Khappud
