Shillong, Nailur 11 : Ka Myntri ka Koit ka Khiah Kong Ampareen ha ka sngi Nyngkong, kala hiar jurip ia ka jingtei ba dang iaid mynta jong ka hospital AYUSH ba 50 jingthiah ha Sohra.
Ia kane ka project la bei tyngka hapoh ka National AYUSH Mission da ka Ministry of AYUSH ha ka jingmang tyngka ba kot T.10.55 klur.
Kane ka project kala sdang treikam naduh u snem 2016-2017 bad mynta ka jingtei kala iaid haduh 90% eiei bad hadien kane ka lyiur la khmih lynti ba ka project kan dep noh.
Kane ka Hospital ba 50 jingthiah la buhpor ban pyndep noh haba kut jong u bnai Risaw 2023. Kane ka hospital kan pyn myntoi bha ha ka liang ka jingpynbiang ia ki lad jingsumar hapoh ka Jylla khamtam ha ka thain Sohra. Hadien ba plie ia ka, kane ka hospital kan ai ka jingshakri ha ka OPD, IPD, Antenatal Care bad kiwei kiwei.
Kane ka Hospital ka don ruh ia ka jaka ban sdang ia ka Operation theatre, Optometry, Labour room, Panchakarma, bad kiwei kiwei. Nalor kane, kane ka centre ka don ruh ia ki jaka sah na ka bynta ki doktor AYUSH bad ki nongtrei klas IV.
Ha ka jingjurip, ka Myntri kala shong bishar iaka por bala buh ban pyntreikam noh ia kane ka centre bad ki Ophisar ka Tnad ka koit ka khiah.
Kala pyntip ba ka jingthungkam ia ki Doktor AYUSH la shimti ban leh da ka District AYUSH Society haba kut jong une u bnai. Ka jingpynkhreh ia ki jingdonkam baroh haba iadei bad ka thied ka pet ia ki tiar ki tar ruh kala iaid shaid shaid.
Ka myntri kan sa shong jingialang shen bad u DyCM ba khmih ia ka surok Bah Prestone Tynsong ha kaban shna pynbha ia ka surok ba 2 km sha kane ka jaka sumar.
