Ym I don jingkyrmen shuh ban pynim ia ka karkhana
Shillong Jymmang 29: Ka Committee on Government Assurances jong ka Meghalaya Legislative Assembly, hapoh ka jingialam u Chairman Bah Renikton Lyngdoh Tongkhar hynne ka sngi Thohdieng, kala leit jurip ia ka karkhana pynmih dewbilat ka Mawmluh Cherra Cements Limited (MCCL) kaba don ha Sohra.
Ha katei ka jingjurip la iadonlang ki dkhot jong ka Committee kiba kynthup ia ki MLA u Bah Gabriel Wahlang bad u Bah Matthew B Kurbah, ki heh ophisar sorkar kiba khmih ia katei ka karkhana khamtam haba ka sorkar jylla ka don iaka jingthmu ban khang khyrdep noh ia kane ka karkhana pynmih dewbilat.
Ka Managing Director ka MCCL, Kong W.A.M. Booth, u Chief General Manager ka MCCL, u Bah K. Lyngdoh bad kiwei kiwei kila iashimbynta ha ka jingialang bad ka jingiatai.
Ha ka jingiatai, u Bah Renikton Lyngdoh Tongkhar, ula pynpaw ba kam i don jingkyrmen ia katei ka karkhana ban pynkhie im biang namar ba ki don bun bah ki daw bad khamtam eh kan bun ruh ka jinglut na ka bynta ban pyniaid ia katei ka karkhana.
Ka dkhot ka Committee da kawei ka jingmut kila mynjur ban ai jingmut ia ka sorkar ban pynkylla noh ia katei ka karkhana sha ka Musuem bad ia ki Quarter jongka MCCL sha ka Resort, kaban plie lad ruh ia ki nongtrei ban pyniaid ia katei ka Resort bad ia ka Museum bad ula bynrap ba da ka jingpynkylla ia katei ka jaka sha ka jaka jngohkai yn lah ruh ban pynmih pisa.
“Ngi tip ba ka sorkar ka kwah ban pynduh noh ia katei ka karkhana bad ban khang khyrdep noh, hynrei hadien ba ngi la shem ia ka jingitynnad jong katei ka jaka bad ban iohi ia ka jingbha jong ki Quarter bad ki jingtei jong ka MCCL, Nga sngew ba ka long kaba sngewsih ban pynpra noh” ong u Chairman ka Committee.
U Bah Matthew B Kurbah ula phla ia ka jingdon jingiadei bad ka MCCL ha u snem 1999-2000 bad ula pynpaw ia ka jingbynniaw ban khang khyrdep noh ia katei ka karkhana bad ba ki nongtrei kin duhkam duhjam noh.
Ula pdiang ia ka jingai jingmut jongu Chairman ba ia ka histori jong katei ka karkhana dei ban sam ia ki jingtip sha ki paidbah lyngba ka jingpynkylla sha ka Museum bad dei ban pyndonka mda ki nongtrei ban pyniaid ia ka tei ka jaka.
U Bah Gabriel Wahlang ula pynpaw ia ka jingsngewsih ia ka jingkhang ia ka karkhana kaba la pyniaid da ka sorkar jylla bad u kyrmen skhem ba ka sorkar kan ai ia ka bhah kaba bha bad ia ka Plan kaba pdiang da ki nongtrei jong ka MCCL kiban mih noh.
