Shillong, Naiwieng 20: U Chief Executive Member (CEM) ka Khasi Hills Autonomous District Council (KHADC) Ban Pyniaid Sing Syiem, hynne ka sngi Nyngkong, ula hiar jurip biang ia ka Khasi Heritage Village ha Mawphlang ban khmih ia ki jingpynkhreh pynkhrum na ka bynta ban pynlong ia ka Monolith Festival mynta u snem.
Ia u CEM la synrn da u Chairman ka Council bad MDC ka Mawphlang Bah Lamphrang Blah lem bad u Executive Member ka Tnad Arts & Culture Bah Victor Rani nalor ki Engineer ka Tnad PWD bad ka Tnad Sawari ka Jylla bad ki Nongkitkam ka Hima Mawplang.
“Ka jingwan jurip mynta ka long eh ha kaban khmih ba haduh katno ki jingpynkhreh kila iaid khnang ba ngin lah ban ai ia ka kaiphod sha ka Monolith Committee” ong u Bah Pyniaid haba iakren bad ki nongthoh khubor.
Kat kum ka jingong jong u, ka Monolith Festival ka dei kaba tamasa kaba donkam bha namar kane ka tamasa ka dei kaba pyni sha ka pyrthei ia ka jingriewspah ka Jaidbynriew ha ka riti ka dustur, ka synshar ka khadar, ka ktien ka thylliej, ka jinglong trai halor ka khyndew ka shyiap bad kiwei kiwei.
“Ka tamasa kan pyni ia ka spah tynrai ba ngi don, ka ktien ka thylliej jong ki 54 tylli ki Hima kiba iapher, ka riam tynrai, ka kup aks em, ka bam tynrai na ki Hima bapher bapher” ula ong.
U Bah Pyniaid u pyntip ba ka KHADC ha ka jingshisha kala buh ban pynlong ia ka tamasa haduh lai sngi kata naduh ka 14 tarik Nohprah haduh 16 tarik Nohprah mynta u snem.
“Hynrei na kaei kaba ngi shem mynta, ngin sa rah iakren hapoh ka Monolith Committee ban pynbeit ia ki Tarik ba thikna bad ban bishar ruh lah ngi dang lah ne em ban pynlong mynta u snem” ula ong.
U CEM u pyntip ba da ka jingiatreilang bad ka Sorkar Jylla, ka Tnad Sawari kala iarap ban maramot ia bun ki jingdonkam ha kane ka Khasi Heritage Village, kynthup ruh ia ka ka Khasi Heritage Museum ban buh ia ki tiar nala tynrai ka Jaidbynriew, ki kot kba batai ia ka riti dustur bad kiwei kiwei.
U pyntip ruh ba u Myntri ka Tnad PWD (Roads) ula pynmang T 4 klur ban maramot ia ki surok naduh na Mawngap ter ter sha Mawphlang n aka bynta ka tamasa.
U CEM u pyntip ba ka KHADC ka don jingthmu ruh ban pynlong noh ia ki prokram nala tynrai manla ka taiew hapoh ka Khasi Heritage Village khnang ba ki nongshang sawari kin myllen bad kane ka jaka kaba don ha syndah ka khlaw Lawkyntang jong ka Hima.
 ka Khasi Hills Autonomous District Council (KHADC) Ban Pyniaid Sing Syiem, hynne ka sngi Nyngkong, ula hiar jurip biang ia ka Khasi Heritage Village ha Mawphlang ban khmih ia ki jingpynkhreh pynkhrum na ka bynta ban pynlong ia ka Monolith Festival mynta u snem.){kind=link}