Shillong, Naiwieng 09 : Ka jingiakhun hapdeng ka Shillong Lajong pyrshah ia ka Neroca FC kala kut ha ka jingiakhaid ba mar 1-1 kol, ha ka jingialehkai Home Game ba nyngkong eh jong ka Shillong Lajong hynne ka janmiet sngi Palei.
Da ki hajar ngut ki riewieid phutbol kila poi ban sakhi ia kane ka jingialehkai jong kane ka lympung ba hehduh hapoh ka Ri, kaba la wan biang sha Shillong hadien saw snem.
Ka Shillong Lajong kala ioh ban pynkhih nyngkong eh ia ka jar ha ka minit kaba 33 lyngba u Captain uba dei na Brazil u Daniel Gonsalves, uba la ioh thep ia ka kol da ka khlieh hadien ka jingpynbuh bol u rang ialehkai ka Japan u Takuto.
Kane ka kol kala pynshongshit bha ia ki paidbah nongpeitkai kiba la wan ban ai jingkyrshan iala ka jong ka kynhun, kaba la ioh iakhun biang ha kane ka lympung.
Hynrei dei ha ka minit ba 79, u rangialehkai ba shakhmat ka Neroca Fabrien ula ioh ban pynphai ia ka kol ban pyniakhaid. Ka jingiakhun kala shongshit bad iakhaid bha tad haduh da put pynwai.
Ka Shillong Lajong kan ialehkai biang hala iing ha ka 12 tarik u Naiwieng, ha kaba kan iakhun pyrshah ia ka Sreenidi Decan ha madan SSA First Ground, Polo, Shillong.
