Nang jur ka jingiakynad ki Karbi bad ki Khasi-Pnar
Shillong, Nailar 26: Ka jingiakynad hapdeng ki paid Khasi-Pnar bad ki Karbi kala nang jur ha ka shnong Lapangap namar ka jingwan pynibor jong ki paid Karbi kiba la beh khtong wat ia ki Pulit ka Meghalaya kiba leit pahara ia kane ka Shnong.
Ka kynhun ki Pulit ka Meghalaya kila hap ban her krad lailum laiwah hynne ka janmiet sngi Saitjain na ka jingwan tur kynsan kynsan jong ki paid Karbi ban thombor ia kawei ka jaka jong ka shnong Lapangap kaba la tip kum ka Pynthor.
U Bah Chandame Sungoh Nongialam ka Hynniewtrep Border Disputed Redressal Forum (HBDRF) ula pyntip ba kane ka jaka (Pynthor) ka dei ka jaka kaba ka shnong Lapangap kala pynlong kum ka jaka thung ia ki tynrai dieng bala ioh naka skhim jong ka Meghalaya Integrated Basin Development Authority.
Kat kum ka jingong jong u, kane ka jingwan thombor ki paid Karbi ia kane ka jaka kala jia mynta la arbnai eiei bad kala jia ruh ha man ba ka shnong Lapangap ka thung tynrai dieng.
La kynnoh ba ki paid Karbi kila dusmon ia kine ki dieng bad kila jynrat naphang da kaba kam trai ba kane ka jaka ka dang hap sha Assam.
U Bah Chandame u pyntip ba dang mynshisngi, kala mih ka jingiakynad hapdeng ki paid Karbi bad ki Khasi-Pnar ha Lapangap. U ong ba dei namar kane ka huri hura ba ki Pulit ka Jylla Meghalaya kila wan ban pahara ha kane ka shnong ban tehlakam ia kino kino ki jingjia kiba sngewsih.
Hynrei u iathuh ba hynne ka janmiet, kynsan kynsan kumba 150-200 ngut ki paid Karbi kila wan thombor biang ia kane ka jaka (Pynthor) kaba ap pahara ki Pulit ka Jylla, haduh ba ki Pulit kila hap phet krad.
U Bah Chandame u pyntip ba ka jinglong jingman ha kane ka shnong Khappud ka la shongsyier bad ki paidbah Khasi-Pnar kila hap ban ap shnong ioh don kano kano ka jingpyrshang ban wan thombor ki paid Karbi.
Kat kum ka jingiathuh jong u, kane ka jingjia hynne ka janmiet kala jia ruh tang shisngi hadien ka jingmih khubor ha kawei ka kot khubor Karbi Anlong ba kynnoh ia ki paid Khasi-Pnar ba ki thang ia kawei ka Iing ha ka shnong Tahpat, Karbi Anglong.
U iathuh ba kane ka kot khubor kala pynsaphriang ruh ia ka video ba shah thang kane ka Iing, kaba long kum ka jingai ding ia ki paid Karbi ban ieng pyrshah ia ki paid Khasi-Pnar.
Haba kylli, u pyntip ba kum u Nongialam ka HBDRF, ula iakren bad ki nongshongshnong ka shnong Tahpat Karbi, kiba la pyntip ba kane ka jingthang iing ka dei kaba la leh hi da ki paid Karbi tang ban ioh daw ia ki paid Khasi-Pnar.
Pule ruh: Boycott ka HYC-WKH ia ka TOPCEM, kyrpad ia ki Nongkhaii ban sangeh die syndon
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
