Shillong, Nohprah 12: Ka Khasi Students’ Union (KSU) hynne ka sngi kala pynlong daka jingwah Lama iong kum shi bynta na ka jingiakhih jong ka North East Students’ Organization (NESO) ban pyrshah ia ka jingpyntreikam ia ka Citizenship (Amendment) Act, 2019 ha baroh kawei ka thain shathei lam mihngi (North East).
Iaka Black Day la rakhe ha baroh 7 tylli ki Jylla ka thain shathei lam mihngi (North East).
Ha Shillong, ki dkhot ka KSU kila teh bad wah daki lama iong bad daki banner iong ban kynthoh pyrshah iaka CAA ha kylleng ka nongbah kynthup ha Khyndailad.
Ki Pla Card ki thoh, “11.12.2019 kadei ka sngi baka CAB ka kylla CAA, kadei ka sngi ba dum iaki riewlum ka NE, ka sngi jingshai iaki poiwir”, Ban wad, ban weng bad pynphai iaki poiwir hadien 1971 haka jaka ban ai jaka sah ba shngain” bad ka North East kam dei ka jaka bret iaki poiwir “.
Naka liang u President ka KSU u samla Lambokstarwell Marngar ula ong ba ka jingrai ka Sorkar Pdeng ban pyllait iaki jaka ba hap haka khyrnit ba hynriew hapoh Meghalaya naka CAA kadei tang ka buit ban pynbiej iaki paidbah.
“Ka nongrim baka NESO halor ka CAA kadei ba ym dei ban pyntreikam ha baroh kawei ka thain shathei lam mihngi kynthup ka Meghalaya” ula ong.
Haba kynnoh baka CAA kadei ka buit ban pynbun daki poiwir ha NE, u samla Lambokstarwell ula ong “Ngim donkam iaka CAA, Ngi donkam ki ain ba khlain ban tehlakam iaka jingwan buhai shnong ki bar jylla hapoh ka thain baroh kawei”.
Naka liang u Chairman ka NESO u Bah Samuel B Jyrwa ula pynkynmaw iaki paidbah ka thain North East ba haka 11 tarik Nohprah 2019, wat hapdeng ka jingpyrshah kaba jur pyrshah iaka Citizenship (Amendment) Bill 2019, ka Sorkar Pdeng ka iaid shakhmat khlem ka jingsuidniew iaki riewlum ka thain North East bad lyngba ka Rajya Sabha kala mynjur iaka ain Citizenship (Amendment) Act 2019.
Ka NESO kala rai ban kynmaw iaka 11 tarik Nohprah kum ka sngi ba dum iaka thain North East baroh kawei.
“Ban bteng iaka jingpyrshah ka NESO kala rai ban wah daki Banner bad Pla Card rong iong ha baroh ki Jylla ka thain shathei lam mihngi” la ong u Bah Samuel.
“Kane kadei ban phah kyrwoh shaka Sorkar Pdeng ba ngi pyrshah jur iaka Citizenship (Amendment) Act 2019 bad haka jur ka por ban pynkynmaw iaki riewlum ka thain shathei lam mihngi halor ka sngi shah thombor haka Sorkar Pdeng iaka jinglong kyrpang ki riewlum ka North East” ula ong.
