Shillong, Nailur 20 : Ka Congress kaba don ha Liang Pyrshah ha Jylla, ha ka sngi Thohdieng, kala pynpaw ba kan iai ap shuwa ia u soh ba mih na ka jingtyrwa pynkylla thymmai ia ka Sixth Schedule ka Riti Synshar ka Ri hashuwa ban shim rai halor ka jingiatreilang bad ka National People’s Party (NPP) hapoh Khasi Hills Autonomous District Council (KHADC).
“Ngi don iala ki buit treikam, ngi don iala ki plan. Ngi la iakren bad baroh bad ngi don ha ka lynti kaba dei ia mynta namar ngi la rai ban leh eiei ha ka por kaba dei, ban don ka lynti kaba biang eh ha kaban weng ialade” ong u President ka MPCC Bah Vincent H Pala haba iakren bad ki nongthoh khubor hadien ka jingialang jong ka Congress.
“Ngim dei ka party kaba iasoh mynta bad phet noh lashai. Ngi tip bha ia ka jingktah hynrei ha kajuh ka por, kam lah ban long ba phi iasoh bad shu ieh noh kumto” ula ong.
U Bah Pala ula pynkynmaw ba ka jingthmu jong ka Congress haba leit iasoh sha ka Executive Committee ba ialam da ka NPP ha KHADC ha kato ka por ka long namar ba don ka jingtyrwa ban pynkylla ia ka Sixth Schedule jong ka Riti Synshar ka Ri. Kat kum ka jingong jongu, ka Party kam lah ban shu mih noh shiteng lynti.
“Ngi pyrkhat ba ka Sixth Schedule ka dei ka jingai sngewbha jong ka Congress sha ki paidbah ka North East. Haba pynkylla ia ka, ngi dei ban don bynta lang ha ka. Ha kajuh ka por, ki District Council kin jin da la ioh da ka jingsynshar Administrator hynrei ngi pyrkhat ba balei ngin shu pyndem. Ngi pyrkhat ba ngim dei ban pyndem hynrei ba ngi dei ban iada ia ki paidbah ka Meghalaya da kaba iadon bynta lang ha ka jingpynkylla (amendment). Ka Amendment ka dang iaid mynta bad kam pat kut satia. Ka jingiakren hapdeng ka Sorkar Pdeng bad ki Jylla bad District Council ki dang iaid. Ngim lah ban shu ieh shiteng lynti” ula ong.
Haba kylli, une u Heh ka Congress ula kren shai da kaba ong “Ngim ong ban gin iatreilang ne mih noh. Ngin sa peit ia kaei kaba mih na ka jingpynkylla ia ka Sixth Schedule. Ngin sa peit ba haduh katno ngi lah ban iada, tyngkai bad ai jingiada ia ki briew jong ngi. Ta ka daw ngi don ha kane ka jingpyrkhat”.
Kiba bun ki nongtrei ka Congress kila ai jingmut ia ka jingdonkam ban mih noh na ka EC ba ialam da ka NPP ha KHADC haba kdew ba kane ka jingiatreilang ka dei ka dawbah halor ka jingshah rem u Bah Pala ha ka elekshon MP ba dang shu dep.
Halor kane, u Bah Pala ula ong “Ka jingrem bad jingjop elekshon ka dei shibynta jong ka. Ngi la iakren mynta ka sngi ha ka jingialang bad nga la pynpaw bad batai sha ki bad baroh kila mynjur ia ka jingthmu namar ngi don hangne ba iada. Ngi lah ban rem ha ka elekshon haba sdang hynrei ngim dei ban pynkylla ia ka nongrim treikam jong ngi. Ngi lah ban rem bad jop ia ka elekshonn hynrei lad aka nongrim treikam jong ngi ka skhem, ki paidbah kin sa sngewthuh. Ngim dei ban pyrkhat than ia ka jingjop ne jingrem elekshon, ka jingthmu jong ngi hi ka long ban iada, tyngkai bad kyntiew ia ka kolshor ki briew jong ngi” ula ong.
 hapoh Khasi Hills Autonomous District Council (KHADC).){kind=link}