Shillong, Nohprah 16 : U Nongialam ka NPP bad Myntri Sorkar Rakkam A Sangma ha ka sngi Nyngkong, ula buh jingkylli la ka Liang Pyrshah Voice of the People Party (VPP) kan khang lut shisyndon ia ka jingwan ki kynhun tem bad nongrwai ha Shillong lada ka shah jied ban shimti ia ka bor ha Jylla.
Kane ka jingkynthoh kala mih kum ka jubab ia ka jingkynnoh jong ka VPP ba ki tamasa iaput iatem ki long kum ki dawai pynkoit ba shipor (painkiller) ia ki paidbah ba kin klet ia ki kam bamsap bad ki jingeh ba mad da ka Jylla.
“Lada jia ba shisien ka sngi ka (VPP) thaw ia ka Sorkar kan nym shah ia ki kynhun tem bad nongrwai kum ka Shillong Chamber Choir ba kin tem ha Shillong. Kane ka dei kaei kaei kaba nga sngew ba kam iahap bad kam bha satia na ka bynta ki samla jong ka Jylla jong ngi…. Ngam tip ia kaei kaba ki mut (da kaba ong ba dei ka dawai pynkoit ba shipor). Hato dei ba kim sngewtynnad ia ki jingput jingtem? Lada ngam bakla, ki bahaiing jong ki, ki nongkyrshan jong ki, lehse kila iadon lang bad u paidbah ha kato ka sngi ba wan tem u Bryan Adams” ong u Rakkam.
“…lada ka wan ha ka bor ka mut ba kin ym shah shuh ia ki kynhun tem bad nongrwai ban wan tem ha Shillong. Kane kam sngew iahap satia bad kane ka dei ka kam pynduh mynsiem bad ka khubor ia kaba ki samla ka Jylla kin nym mynjur satia” ula bynrap.
U Myntri ula pynpaw ba u kyrmen ba bun ki tamasa iaput iatem, kiba kham khraw ban ia ka concert u Bryan Adams, ka dei ban wan ha Meghalaya.
“Lada u Rakkam Sangma u rwai ha madan Polo, hato ki paidbah kin wan sha Shillong ? Hato ki hotel kin dap da ki briew? Yn nym don mano manor uh ban wan. Hynrei ha ka concert u Bryan Adams, ngi la iohi ba ki hotel kila shlei, baroh ki dukan kila shlei, baroh ki kali kila shlei namar ki briew kila wan na kylleng ki Jylla bad kila theh pisa ha Jylla. Namar kata, kam dei satia ka kam ba kut tang ha ka iaput iatem” ula ong.
“Namar kata, lada don mano mano ha kane ka juk ba mynta ki bym pdiang ia ka jingwan ki nongrwai ba pawnam ka pyrthei sha Shillong, kane ka dei ka kam kaba sngewsih khamtam haba baroh ki nongshngshnong ka Jylla ki dei kiba sngewtynnad ban sngap ia ki jingrwai, jingput jingtem bad ieid ban rwai” bynrap u Myntri.
 kan khang lut shisyndon ia ka jingwan ki kynhun tem bad nongrwai ha Shillong lada ka shah jied ban shimti ia ka bor ha Jylla.){kind=link}