Shillong, K’lyngkot 07: U Chief Secretary ka Jylla Bah DP Wahlang ha ka sngi Ba-ar ula pyntip ba ka Committee bala thaw ban ai jingmut ha kaban pynkylla thymmai ia ka rukom treikam jong ka Meghalaya Public Service Commission (MPSC) kan sa aiti ia ka kaiphod hashwa ban kut u Kyllalyngkot.
Haba kren sha ki lad pathai khubor, u Bah Wahlang ula ong “ Ka Sorkar kala thaw ia ka Committee bad kala dep ban iashong jingialang bad ia ka kaiphod la khmih lynti ba kan aiti haba kut jong une u bnai”.
“La pyntip sha nga ba kila pynrung ia katti katne ki stad na shabar ka Jylla. Kin sa khot ia katto katne ki dkhot na ki riew paidbah ba kin iadonbynta lang ha kane ka kam bad nga thikna ba kane ka Committee kan sa iatai bniah bad aiti ia ka kaiphod hapoh ka pot kaba biang” ula bynrap.
Halor ka jingiaid ki kam jong ka Expert Committee on Reservation Policy, u Chief Secretary ula ong “ Kila leit kylleng ki jaka bad kila dep iashong jingialang ha Shillong, Jowai bad ha Ri-Lum Garo ruh bad ki dang shu dep shong jingialang dang shitaiew mynta ha Delhi ha kaba baroh ki dkhot kila iadonlang ban iakren ia ki jingshem baroh na ka jingleit sha kylleng ki bynta ka Jylla. Nga tharai ki dang pynkhreh mynta ia ka kaiphod”.
Hynrei ula bynrap “ Haduh katno ka por kin shim ban pyndep ia ka kaiphod, nga hi ngam don jingtip ia mynta. Hynrei, ki la pyndep ia ki jingialang, kila iakynduh ia ki kynhun bapher bapher ki seng sain pyrthei, ki seng ki samla pule, ki Sengbhalang bad ki riew paidbah ha kylleng ka Jylla kynthup ha Jowai, Shillong bad Tura”.
