Shillong, Nailar 04 :Ki Nongshong dukan ha Iew Nongstoin kila hap ban khang noh ia ki dukan tang mar syn dum ka bneng kata hapoh ka 7 baje namar ka jingjyllei palat ki nongdie droks bad ki nongdie kyaid, kaba la pynkharoi ia ki kam sniew ha iew ka hat bad pynsyier ia ka leit ka wan ki nongthied nongpet.
Ka Shlem kaba la sakhi ia kane ka jinglong jingman ha Iew Nongstoin, kala ioh iakren bad ki nongshongshnong Iew kiba la pynpaw ba ka jingjyllei ki nongkhaii droks bad nongdie kyaid kala long shaba palat liam ha kane ka Iew haduh ba ki nong shong dukan khlem da iakren ia ki nongwan thied wan pet, kila rit mynsiem ban plie slem ia ki dukan ne wat ban leit buh ia ki mar ki mata sha ki kudam tang mar syn kem dum ka bneng.
Kane ka jingsyier kala mih hadien bala don ki katto katne ki jingjia khamtam ki longkmie kiba la shah knieh jynthet ia ki pla pisa bad wat ia ki jingdeng ksiar ruh kumjuh.
Kawei ka Longkmie Kong Delina Jyrwa kaba dei kawei na ki lanot ba shah jynrat shiliang ka shahskhor ha u nongtuh, kala pynpaw ba ka Iew Nongstoin kam dei shuh kaba shngain namar ym lah tip ki nongtuh bad nongdih droks ki lah ban ap ha kano kano ka por ban thombor.
Kala ong ba ka jingshah thombor jong ka ruh kala jia ha ka por ba ka dang mih na kudam kaba don ha Iew bad u nongtuh u dei uba la apthap lypa ia ka ban leh ia kane ka kam bymman.
Kum ban shu pynkynmaw ba ka ïew Nongstoiñ ka dei kawei na ki ïew kaba heh bad kaba la pawbha naduh mynshuwa bad kam ju don kano kano kaba sniew. Baroh ki nongshong ïew ki ju shongsuk shong shngaiñ kumjuh ruh ki nongleit nongwan siew ruh kim ju don jingtieng ei ei ruh em.
Hynrei, kane ka jinglong jingman kaba la long mynta ka la pynjah burom shikatdei eh ïa ka thaiñ hi baroh kawei, namar ki jingjïa basniew kum ka jingïashoh ïadat, jingshah kloh jubor ïa ki pla, jingshah knieh kynthed ki jingdeng ksiar bad kiwei kiwei kaba ju jïa khah khah.
