Shillong, Nailur 11: Ki Pulit pynïaid kali lane Traffic Branch jong ka Nongpoh Police Station ka la pynlong kyndit kyndit ïa ka jingtalasi kali ha Sericulture Junction kaba don hajan Nongpoh bad kila ioh dain kuna haduh T.1 Lak tang hapoh shi kynta.
Ia kane ka jingtalasi la pynlong hapoh ka jingpeit jong u Additional Superintendent of Police (In-charge Traffic) Orville Massar haka jingdon lang u Traffic In-charge Rubul Ali bad kiwei kiwei ki Ophisar.
Ha kane ka jingtalasi, ki Pulit kila talasi ïa baroh ki jait kali kynthup ki kali shimet bad ki kali kamai ha kaba katto katne ngut ki nongñiah kali ki la shah dain kuna namar ka jingñiah kali khlem ki kot ki sla kiba biang lane khlem ki License, ka jingtah iit iong iaki kali bad ka jingpyndait light LED.
Nalor ka jingdain kuna, ki Pulit ki la pynsngewthuh ruh iaki nongniah kali halor ka jingdonkam ban rah ia ki kot ki sla kiba biang, ban bud ia ki kyndon niah kali bad ban pynthikna ia ka jingshngain ha ki surok bah.
Ki Pulit ki la pynthikna ba kin iai bteng ban pynlong ïa kum kine ki jingtalasi ban khanglad ïa ki jingpynkheiñ iaki aiñ niah kali bad ban wanrah ka jingshngain haki surokbah jong ka thain Ri-Bhoi district.
