Nongpoh, Jymmang 01 : Hapdeng ki ummat kthang bad ka jingpait dohnud ki Kmie Kpa bad ki baieid bathoin baroh, la thang don burom ia ka met ba sah jong ka samla Walinda Binong hynne ka sngi Nyngkong hadien ka jingpyndep ia ka lehniam lehrukom kaba khatduh.
Ka samla Walinda Binong ba na Nongagang, Marngar, kala khlad ha ka 27 tarik Iaiong ha ka kamra sah jong ka Modi University, Rajasthan bad ki bahaiing hasem kila suba jur ba kane ka khun jong ki, kala iap ym na ka jingsdien phasi hynrei na ka jingshah pyniap.
Ki paidbah Nongshongshnong ka thain kila iatuid sha Nongagang ban leit sngewlem halor ka jingkhlad noh jong kane ka samla ha ka rta ba dang khynnah bad kaba dang khie dang san.
U Bah Michael Binong kum u kñi Rangbah ka kur Binong u la ong, ka jingïap katei ka samla kam ai jinghun satia ïaka ïing ka sem bad naka liang ka kur ka dawa naka sorkar jylla bad kumjuh ruh ka sorkar Rajasthan ba ki dei ban shim khia ïa kane ka kam ban pynlong ka jingtoh kit kaba bñiah watla dei shaduh CBI naka bynta ka jingbishar ba hok.
