Shillong , Rymphang 22: Hapdeng ka jingjur jong ka jingpahara hymen ka nsgi Saitjain ka elekshon kaba la pynlong biang ha ka Wapungskur A bad Wapungskur B bad ha ka shnong Bataw Lakadong A bad Bataw Lakadong B kiba hap ha ka Musniang – Rngad Constituency kala long kaba iaid beit iaid ryntih.
Naduh ka por mynstep haduh ka por janmiet ki paidbah kine ki shnong kial ia mih ban leit thep vote ban jied ia ki kyrtong kiba iakhun ia ka elekshon MDC sha ka Jaintia Hills Autonomous District Council (JHADC).
Lah ban ong, ba ha ka sngi Thohdieng ia ka jingthep vote ha kitei ki jaka la hap abn pynsangeh noph da ki bor kiba dei khmih hadien ba ka kynhun ki runar kila leit ban rung jubor hapoh ki jaka thep vote bad kila pynpait bad pynjulor ia ki kor Electronic Voting Machine.
Ha ka jingthep vote kaba la pynlong biang ha ka sngi Saitjain, ka jingpoi thep vote ki paidbah ha Wapungskur A ka long 85.12% katba ha ka Wapungskur B kiba poi thep vote ka long 83.13%.
Ha Bataw Lakadong A ka jingpoi thep vote ki nongshong shnong ka long 80.58% katba ha Bataw Lakadong B ka jingpoi thep vote ka long 77.43%.
Ka jingpoi thep vote ha baroh ki shnong kiba don hap hapoh jong ka Musniang – Rngad Constituency ka kot sha ka 89.51%.
Ban pynthikna ba kane ka elekshon kan long kaba iaid beit iaid rytnih bad kaba khuid bad ban tem ia kino kino ki huri hura, ki heh sorkar, ki bor pyniaid district bad ki heh pulit kila don ha kitei ki jaka thep vote bad la pynjur bha ia ka jingpahara khnang ban pynthikna ba ki paidbah kin ioh ban pyndon kam ia ka hok ka jongki ban jied ia ki nongmihkhmat sha ka JHADC.
