Shillong, June 17: Ka Congress ka Kerela, kala weng noh ia ka jinghoh hapoh ka X, bakynthoh ia ka jingiakynduh hapdeng u Myntri Rangbah duh ka ri u Narendra Modi bad u Pope Francis, hadien ba ka seng BJP bad kiwei ki seng sain̈ pyrthei, kila pynrem jur ia ka jingkynthoh ki bym iahap bad ka thew sha ka jingkren bein̈.
Ka Kerela Congress kala kynthoh da kaba kren dait ha ka X da kaba thoh “Khatduh khatwai u Pope ula ioh ia ka lad ban iakynduh ia u Blei”
Kane ka jingthoh ka Congress ka dei hadien ba u Modi ula iakren bad u Pope ha ka jingialang jong ka G7 ha Italy, mynta ka taiew.
Ka Congress kala kynthoh ia u Myntri Rangbah duh hadien ba ula kam ha ka por ialap elekshon ba um dei uba la kha na ka kmie, kaba kdew ba udei uba la kha kham khraw ban ia ki briew.
U Pope udei u khlieh duh jong ki Catholic bad la niew da ki million ngut ki riewngeit Catholic ba udei u “Riewkhuid uba Im” ne “Living Saint”.
Ka BJP kala shim ba katei ka jingkynthoh kadei kaba niewbein̈ bad kaba pynmong ha ka jingngeit niam khamtam eh ia ki Khristan kiba dei ki jaidbynriew kiba wan balai ha ka jingheh paid ha Kerela.
Ki nongialam ka BJP kila mih ban pyrshah jur ia katei ka jingkynthoh ka seng Congress bad na ka liang u Nongialam ba rangbah ka BJP ha Lok Sabha na ka thain̈ shatei lammihngi bad u MP ka Arunachal Pradesh uba kong ruh u Myntri ka Sorkar Pdeng, ula kyntu ia baroh ban sangeh ia ka jingiaisih pyrshah iwei ia iwei.
“Ngi dei baroh kiba iakhun pyrshah ha ka kam sain̈ pyrthei hynrei ngim dei pat ban isih iwei ia iwei bad ka long kaba sniew ban kynthoh pyrshah ia u Pope” la pynpaw u Kiren Rijiju ha ka X.
We all are political opponents, not enemies. Let’s not hate each other.
It is in bad taste to insult Supreme Pontiff (The Pope) pic.twitter.com/tjLWwnTHJt— Kiren Rijiju (@KirenRijiju) June 17, 2024
