Shillong, K’lyngkot 09 : U Myntri Sorkar bad MLA ka UDP na Amlarem Bah Lahkmen Rymbui ula ban jur ia ka jingdonkam ban pynbiang tarajur ia ka roi ka par ha ka ioh ka kot bad ka jingngewkhia ia ka jingkylla ritpaid ki trai shnong bad ong “ Ngim lah ban kyntait ba ka lynti rel ka synniang sha ka jingkiew ha ka ioh ka kot, hynrei ka jingeh jong ngi hangne ka pher namar ba ngi long kiba ritpaid bad ka jingsheptieng ban shah tyllep ha ki briew ba nabar”.
U Bah Lahkmen ula ai khublei ia ka thong jong ka Sorkar NDA ban pyniasoh lynti rel bad kad liengsuin ha baroh ki nongbah jong ki Jylla, hynrei ula ban jur ba hap ban sngap pat ia ka jingsngew ki trai shnong hangne ha Meghalaya kaba dei ruh ka Schedule area.
Haba iaroh ia ka jingpyrshang ki Dorbar Shnong ban pyrrkhing ia ka jingwan rung ki briew ba nabar, u Bah Lahkmen ula ong “Ngi don ia ka ain shnong kaba khlain ban tehlakam ia ka jingrung ki briew nabar. Ki briew ba nabar kin hap ban bud ia ki kyndon jong ki Dorbar Shnong bapher bapher”.
Ula pynpaw ruh ia ka jingeh ha ka jingialeh ban tehlakam ia ka jingrung ki mynderi ri haba ai nuksa ia bun ki khep ba ioh kem ia ki nong Bangladesh ha Meghalaya.
