Nongpoh, Nohprah 04 : Ki Nongkhaii syiar ka them Ri-Bhoi kila ngat ha ka jingshah khrong bai musur ba kot haduh T. 30,000 shi kali ban wan pynpoi syiar sha Nongbah Shillong, ha ki briew ki bym lah ban tip ki dei kiei bad mano bala ai bor ia ki ban lum musur.
Kane ka kam kala paw pyrthei da ka jingmih ki nongkhaii syiar ha ryngkat ki kynhun Sengbhalang ba kynthup ia ka Confederation of Ri Bhoi People (CoRP), bad Hynniewtrep Integrated Territorial Organization (HITO), ban leit ujor ia kane ka kam be-ain hapoh ka Ophis u Deputy Commissioner ka Ri-Bhoi District.
Ki Nongialam ka CoRP ba ialam da u President Bandari Ryntathiang lem bad ka HITO bala ialam da u Working President ka Umsning Circle Banpynshai Umbah lem bad katto katne ngut ki nongkhaii syiar, kila aiti ia ka jingujor ha u Additional Deputy Commissioner Bah MB Tongper, ba kyrpad ba un tuklar bad tohkit mardor halor kane ka kam.
Haba kren sha ki lad pathai khubor, ki nongkhaii syiar kila iathuh ba baroh ki kali kit syiar ba mut pynpoi syiar sha Nongbah Shillong, ki hap ban siew ia ka musur ba T. 30,000 shi kali bad ia kane ka musur la lum da ka kynhun ki bym lah ban tip la kila iohbor ne dei ba shu khrong beain.
Kat kum ka jingiathuh jong ki, ia kane ka musur la kynnoh ba la phah lum da uwei u rangbah uba la tip kyrteng kum u Wanshai Khanshandi uba ju lum ia ka musur ha ka kyrteng jong kawei ka Association na Nongbah Shillong.
Ki nongkhaii syiar kila pynpaw ia ka jingbynniaw kaba jur ia kane ka jinglum musur bad ong ba kane ka kam kala ktah bha ia ka kamai ka kajih jong ki khamtam ba hiar dor ka doh syiar ha iew ha hat.
U Working President ka CoRP Pateng Myrsing ula pynrem jur halor ka jingmih ki kynhun ban lum musur beain na ki nong rep bad ki nongri jingri ka Jylla haba dawa ia ki bor District ba dei ban tohkit mardor bad ban shim ia ka lynti kaba tyngeh ia kiba donkti.
Ha kajuh ka por, ula dawa ia ki bor District ba kim dei ban ailad ia kum kine ki kynhun kiba ju mih ha ki surok bah ban lum musur beain khlem da iohbpr na ka Sorkar Jylla ne na ki tnad ba dei khmih jong ka Sorkar.
