Shillong, Naitung 21: Ka jingthmu ban plie ia ka Block Integrated Development Complex ha Mawpat, la hap ban pynsangeh noh hadien ba kala mih ka jingpyrshah jong ka Dorbar Shnong Mawpat.
Bun ngut ki paidbah kila ialum bad khanglad ia u Myntri ka tnad Community & Rural Development u AT Mondal bad u Myntri ka tnad Animal Husbandry & Veterinary u Bah AL Hek uba long ruh u MLA ka Pynthorumkhrah constituency, ban rung shapoh ka ophis treikam jong ka Block ryngkat ka jingpyrta shla ia ki jingpyrshah ia ka sorkar jylla ryngkat bad ka rah ia ki lama ïong.
Kine ki paidbah kiba la pynlong ia ka jingiakhih kila dawa na ka sorkar ba kadei ban burom ia ka jingiatehkular kaba la iasoi ha ka por ba la noh synniang ei ia ka jaka ha kaba la kynnoh ba kala don ka kyndon ba dei ban thungkam ia ki trai nongshong shnong bad ban mang tyngka khambun ia ka block.
Ki nongiakhih kila kynnoh ba ka sorkar kala pulom ha kaban pynurlong ia ki jingkular, kaba la lam sha katei ka jingiakhih ban pynpaw ia ka jingpyrshah. Ki trai shnong kila daw ana ka sorkar ba kadei ban bud ryntih ia ka jingiatehkular ban aikam aikam ia ki nongshong shnong ka Mawpat.
Ka Dorbar Shnong kala pan ruh ba dei ban bhah tyngka bun ia katei ka Block ban pynthikna ba kan lah ban treikam bha.
Ki nongiakhih kila pynapw ba kiba la shah thung kam lyngba ka Casual bad Contractual kila ioh ia ka jingsiew kaba duna bha kaba long T.3000 haduh T.8000 namar ka jingpulom ha kaban pyntreikam ia ka ‘Minimum Wage ne ka bai bylla sngi.
U Myntri ka tnad Community & Rural Development u AT Mondal ula pynthikna ba yn shimkhia ia kane ka mat kaba la pynsngew da ka Dorbar Shnong.
Ia ka jingthmu ban plie ia ka ophis jong ka Block la pynkynriah tarik noh tad haduh ban da dep ban pynbeit shwa ia kitei ki jingdawa.
U Mondal ula banjur ba ka ophis jongka Block ka long na ka bynta ban shakri ia ki paidbah bad ka sorkar ka iengskhem ha kaban pynurlong ia ka jingiateh kular.
“Ki (dorbar shnong) kila kdew ba kala don ka jingiatehkular ha ka por ba la aiti ia ka khyndew bad ki kwah bai a kitei ki jingiatehkular dei ban pynurlong da ka kam. Ngi mut ba kin ailad ba ka Block kan treikam namar ia mynta ka shakri na ka jaka kaba shipor bad ngim shym la lah ban ai ia ka jingshakri kaba ia ki paidbah. Kumta ngi la pyrkhat ba dei ban ailad ba ka Block kan iaid shakhmat bad ha kajuh ka por ngin iashimkhia ia baroh ki mat bad ngin pynurlong ia ki” ula ong.
U Myntri ula khot la wer ia ka dorbar shnong ban iashimbynta ha ka jingiakren bad ban iapynbeit ia kitei ki mat. Ula tyrwa ruh ia ki ban wan iakynduh ia u ha ka ophis treikam ban iakren bniah halor kitei ki mat.
Ka dorbar shnong kala dawa na ka sorkar jylla ba kadei ban ai ia ka jingkular da ka jingthoh hashwa ba kin mynjur ban don ia ka jingiatreilang.
Ha kawei pat ka liang, u Bah Hek ula pynpaw ia ka jingsngewkhia halor ka jingpynlong ia ka jingiakhih bad ula ong ba ka dorbar shnong ka lah dei ban wan iakynduh ia u kham hashwa bad ban pynsngew ia ki jingeh kaba ki mad.
“Lada u Myntri ka tnad C&RD ula mynjur ban ym pat plie, kata kadei ka jingrai jong ka tnad. Nga dei tang u MLA ka thain bad ngam dei u Myntri ka tnad C&RD. Ngi hap ban pdiang ia ka jingrai jong ka tnad C&RD.”
“Hynrei lada dei ba don kino kino ki jingsngewkhia, ki (dorbar shnong) ki lah dei ban wan iakynduh ia nga ne ia ka sorkar. Lada jin ba kila wan ban iakynduh ia nga 2-3 sngi shwa ban plie ia ka Block, ngi lah dei ban dep pynbeit ia katei ka kam namar ba ngi kwah ban iatreilang bad ka dorbar shnong,” ula ong bad ka bynrap, hynrei kine kiei kiei baroh, ia kaba kim shym la pyntip satia shaphang kitei ki jingeh.Lada ki nongtrei kim shym la ioh ia ka tulop kaba biang naduh u snem 2016-17, kadei ka kamram ka jong nga ban shimkhia ia kane ka mat bad ka sorkar jylla ban iapynbeit noh ia kane ka mat. Ha ka jingshisha nga dei ma nga uba la ai ia ka jingbthah ban thungkam ia ki”.
“Ngam shym la ioh kano kano ka jingpyntip na ka dorbar shnong halor ka jingshisha ba ki nongtrei kim shym la ioh ia ka bai bylla kaba biang. Nga lah ioh jingtip mynshi sngi lyngba kawei ka shithi kaba la phah ha ka Whatsapp bad nga lah bthah ia u BDO ban pyntreikam ia ka Minimum Wage,” la ong shuh shuh u Bah Hek.
U Rangbah Shnong ka Mawpat u Bah Judah Wahlang ula ong ba ka Dorbar Shnong kala dawa na ka sorkar ban burom ia ka jingsngew jong ki paidbah bad ban pynbeit noh mardor ia kitei ki mat.
“Lada ka sorkar ka long kaba kloi ban ai ia ka jingkular lyngba ka jingthoh, ngin khang shnong biang ban wan ban iashimbynta ha ka jingplie ia ka ophis jongka C&RD” ula ong.
“U Myntri sorkar bad u MLA kila ai ia ka jingpynthikna. Kan shong ha ki. Ngi kwah ia ka jingkular da ka jingthoh bad shisien ba ngi lah ioh pdiang ia katei, ngin sa rah bad pule hapoh ka dorbar bad lada kadei kaba la pdiang, kumta ngin ai ka jingiatreilang kaba pura bad ka sorkar” ula pynthikna.
