Shillong, Jylliew 06 : U Myntri Rangbah ka Jylla Conrad K Sangma hynne ka sngi Ba-ar, ula ong ba ka Sorkar Jylla kan hap bann pynlut sa T. 300 klur ka pisa ban thied ia ka bording lada dang bteng ka jingtyrkhong slap ha kine ki 100 sngi ban wan.
Haba iakren bad ki nongthoh khubor, u Myntri Rangbah ula ong ba lada khein ia ka jingpynlut kyllum lang ha kine ki arsnem bala leit noh, ka Sorkar kala hap ban pynlut kumba T. 600 klur na ka iarong tygng ban siew ia ki bai bapher bapher kynthup ka jingthied ia ka bording ban lah pynneh ia ka jingai bording ba ngi ioh mynta.
“Ngi la thied jan kot T. 3 klur ka bording man ka sngi wat haduh mynta namar ka jinglong ka suinbneng ba ngi mad mynta. Namar kata, lada kane ka jinglong jingman ka dang iai bteng ha kine ki 100 sngi ban wan, ngin hap ban pynlut sa T.300 klur tang ban thied bording, tang ban lah pynneh ha kajuh ka kyrdan ia ka jingpynlip bording ba treikam mynta” ula ong.
Haba pynpaw ba ka jinglong jingman ka long kaba eh bha, u Myntri Rangbah ula ong “Hynrei ngi la pyrshang kat kaba lah ban pynthikna ba ka jingpynlip bording kan ym iaid palat ia kane kaba mynta”.
Haba kren ia ka jingnang hiar ka um ha pung Umiam, u Conrad ula ong ba u pud ula jan poi haduh ba hap ban khang dam namar ka Jylla kam shym la ioh ia u slap ha kine ki bnai bala leit noh bad bynrap ba kane ka dei kawei na ki jingeh ha kine ki bnai haba phai sha ka jinghap slap ha ka Jylla.
Haba pynpaw ruh ba ka jingduna bording kala ktah ruh ia kiba bun ki bynta jong ka Ri, u Conrad ula ong “Jan baroh ki Jylla kila mad ia kajuh ka jingeh ba ngi iakynduh. Kane hi ka dei kumba nga ong, u slap ula ktah ia baroh bad ka jinglong jingman hi kala sniew ha baroh ki jaka”.
U Myntri Rangbah ula ong ba ka Sorkar jong u, kala pyrshang kat kaba lah ban leh eiei halor kane ka jinglong jingman bad kyrmen skhem ba u slap un wan hap noh.
Haba ban jur ia ka jingdonkam ban pynkhlain ia ki lad ki lynti ban kyntiew ia ka jingpynmih bording ha ka Jylla, u Conrad ula ong “Ka jingpynmih bording na ka Sngi kan dei kawei na ki lynti hynrei kane kan nang shimpor”.
“Hynrei katba ngi dang iaid shakhmat, nga kyrmen ba ha kine ki ar-lai snem ban wan, ngin sa iohi ia ka jingpynmih bun ka bording na ka sngi” ula ong.
U Myntri Rangbah u pyntip ba ka Sorkar kala iatrei ryngkat ryngkat bad ki bor pynmih bording na ki Thermal Plant namar “Ngi kwah ba mynta bala ai licence ban tih dewiong, ngi kyrmen ban gin lah ban sdang noh ia ka thermal plant ruh bad kane ka lah ban long ka lynti ban neh slem kaba ngi lah ban iohi ha kine ki 3-4 snem ban wan”.
Haba pynpaw ia ka jingsngewkhia halor ka dor ka mur jong ka bording, u Conrad ula ong ba ka Jylla kam don satia ia ka bor ba pura halor ka dor ka mur bala buh da ka MeECL namar ia kane ka kam la khmih da ka Regulatory Commission.
Kat kum ka jingong jong u, namar kane, ki nongpyndonkam bording kila hap ban siew kham bun ban ia ki karkhana. Ki Nongpyndonkam bording kila hap siew ia ka bai bording ha ka bor ba T. 6 katba ki karkhana ki siew ha ka dor ba T. 5.
“Ia kane ka dor la buh da ka Regulatory Commission wat hapdeng shibun ki jingkyrpad ba ki karkhana ki dei ban siew kham bun. Ngi khlem pat ioh ia ka jubab na ki bad ngi dang iakren bad ki bad ngi la pyrshang ruh ban pynbeit ia kine ki kam bad ruh ia ka dor bala buh sha ki nongpyndonkam bording kaba kham rit haba ianujor bad ka dor ba ka MeECL ka hap siew mynta” ula ong.
