Shillong, Naiwieng 13 : Ka Khasi Hills Autonomous District Council (KHADC) kala kular ban wanrah ia ka amendment jong ka KHAD ( Constitution of District Council ) (Amendment) Rules, 2024 ha ka Dorbar Tlang ban wan la 19 tarik Nohprah, ban pynthikna ba 3 tylli ki Polling Station kin leit phai biang noh sha Mawshynrut constituency.
Ia kane ka rai la shim hadien ka jingwan tur paidbah jong ki 21 tylli ki Shnong hapoh ka lama jong ka Joint Action Committee (Misei, Mawsmai & Langdongdai) West Khasi Hills hakhmat ka Ophs ka KHADC ban pyrhsha jur ia ka jingpynbeit thymmai ia u pud u sam ki MDC constituency da kaba rah jubor ia ki na Mawshynrut sha Rambrai-Jyrngam.
Ha ryngkat ki placard, kine ki nongiakhih kila khang lynti syndon ia ka surok ha Garikhana hadien ba kila shah khang ban rung shapoh ka phyllaw ka KHADC, kaba la kah lynti syndon ia ka leit ka wan ki kali bad pynbitar ia kiba bun ki nongleit nongwan namar ka jingpyndik kane ka jingiakhih.
Kine ki 21 tylli ki Shnong ki hap hapoh ki lai tylli ki Polling Station-ka Misei, Mawsmai bad Langdongdai-jong ka Mawshynrut constituency.
“Ngi la rai ban pynlong ia kane ka jingiakhih namar ka jingsngap mynthi jong ka KHADC ia ka jingdawa jong ngi ban nym rah ia ki 21 tylli ki shnong sha Rambrai Constituency” ong u nongialam ka JAC haba bynrap “Ngi kwah ban iai neh bad ka Mawshynrut. Ka Select Committee ka KHADC kam lah ban shu iuhroit ia ka hok jong ngi” ula ong.
Hadien kane, ia ki nongialam ka JAC la khot ban iakren da u DyCEM Bah Pynshngain N Syiem, uba la kular b aka Executive Committee kan sa shong bishar shen ia kane ka kam hashuwa ba kan wanrah ia ka amendment hapoh ka Dorbar Tlang jong ka KHADC, ka ban long la 19 tarik Nohprah.
“Ka EC kan sa shongbishar biang ia kane ka kam bad hadien bala wanrah ia ka amendment, ngin sa leit rah hapoh ka Iingdorbar ban ioh ia ka jingmynjur ( ban pynthikna ba baroh lai tylli ki Polling Station kin neh beit bad ka Mawshynrut constituency kumba dawa da ki paidbah ki 21 shnong)” ula iathuh ha ki nongthoh khubor.
U Bah Pynshngain ula ong ba ka KHADC kala mynjur ia ka KHAD (Constitution of District Councils) (Amendment) Rules, 2024 ba pynbeit thymmai ia u pud u sam jong ki constituency na ka bynta ka elekshon District Council ban sa wan kat kum ka ingai jingmut jong ka Delimitation Committee. Hynrei, dei ha kane, ia kine ki lai polling station la kynthup noh sha ka Rambrai constituency.
“Ka jingthmu ka long ba ka don ka jingai jingmut ba namar ba kine ki lai polling station ki hap hapoh ka Rambrai MLA constituency, balei ba ym rah lang noh ia ki hapoh ka Rambrai MDC constituency. Hynrei, kiba bun ki sngewtynnad ia kane ka rai. Kumta, ngi la kren shai sha ki ba ka EC kan sa shong bishar bad khmih biang ia kane ka kam bad kan sa wan ia ki jingpynkylla ha ka Dorbar Tlang ban wan” ula bynrap.
 West Khasi Hills hakhmat ka Ophs ka KHADC ban pyrhsha jur ia ka jingpynbeit thymmai ia u pud u sam ki MDC constituency da kaba rah jubor ia ki na Mawshynrut sha Rambrai-Jyrngam.){kind=link}