Nongpoh, Naiwieng 29: Uwei u nongbud trok ula iap hashen bad u nongniah pat ula mynsaw jur ha ka jingjia aksiden hynnin ka miet hapoh ka Shangbangla, Ri-Bhoi District.
Kane ka trok ka dei kaba kit ia u clinker bad ka don u nombor WB91-8529. Kane ka trok kala noh shapoh ka riat Shangbangla, ha ka jaka kaba ju jia khah khah ki jingjia aksiden.
Kat kum ka khubor Pulit, katei ka jingjia kala jia hynnin ka por 10 baje eiei mynmiet bad la suba jur ba ka daw jong ka jingjia ka dei namar ka jingpheil ka brake haduh ba u nongniah um shym la lah tehlakam shuh ia ka kali.
La iathuh ruh ba ha kane ka jingjia, kane ka trok kala rat ia lai tylli ki dukan soh ba don harud surok bad donbok ba ym shym la don briew shuh ha kine ki dukan kiba la khang ha ka por ba jia kane ka jingjia.
Ki Pulit haba ioh jingtip ia kane, kila hiar wut wut sha katei ka jaka bad kila pynkit nohia uba mynsaw sha Nongpoh Civil Hospital ban ioh jingsumar.
Ia ka metiap jong u nongniah la ioh ban sei hynne ka step bad la pynkit sha Civil Hospital ban pyndep ia ka post mortem. Ka jingtohkit ia kane ka jingjia ka dang iaid shakhmat.
