Nongstoiñ, Nailar 8: Uwei u Nonghikai Contract uba la shah weng noh na ka kam hikai namar ka jingbym lah ban pyndep ia ka MTET, ula hap ban bteng ia ka kam kum u nonghikai namar ka jingisangsot ia ki Khynnah Skul bad ki Kmie ki Kpa ki bym kwah ia ki Khun ban duh noh ia ki jinghikai tang shiteng por.
Une u Nonghikai u dei u Bah Birbor Riangtem uba hikai ha ka skul Langdongdai Govt Lower Primary. Une u Nonghikai u dei u ruh nongialam ba hakhmat jong ka Synjuk ki Nonghikai Contract kiba la pynlong ia ka jing iakhih dang shen ha Nongbah Shillong.
U Bah Birbor haduh mynta u dang bteng ban leit ai jinghikai ia ki Khynnah Skul LP ha kane ka skul sorkar kaba don ha Langdongdai.
Haba iakren bad u nongai khubor Ka Shlem, u Bah Birbor ula pyntip ba hadien ba ka Sorkar kala wengkam noh ia ki Nonghikai Contract ba khlem pyndep ia ka MTET, ki riew rangbah jong ka Shnong bad ki Kmie ki Kpa jong ki Khynnah skul kila kyrpad ia u ba un bteng beit ia ka jingleit sha skul ban ai jinghikai ia ki Khynnah.
“Ka jingkyrpad ka long halor ka nongrim ba mynta ka sah satang katto katne bnai ba ki khynnah kin hap ialeh ia ki eksamin. Kumta lada ngan sangeh noh ia ka kam, ka jingduh jong ki Khynnah skul kan long kaba khraw bha” ula ong.
“Kane ka jingkyrpad jong ki riew rangbah bad ki Kmie Kpa jong ki Khynnah Skul kala ktah bha ia nga….kumta ngam banse ban leit iarap ban hikai ha kane ka skul. Ka jingleit jong nga ka dei eh namar ka jingisynei ia ki Khynnah skul” ula bynrap.
Kat kum ka jingong jong une u Nonghikai bala shah weng kam, “Ka jingweng noh jong ka sorkar їa ki nonghikai kontrak kiba hikai ha ki Government L.P. Skul, ka la long ka jingduh kaba khraw ym tang їa ki Nonghikai. Hynrei ka jingduh kaba kham khraw ka long їa ki khynnah skul, ki bym tip ei ei їa ka sdang ka kut bad kiba ñiew ba ki nonghikai, kim don jingїapher na ki kmie ki kpa jong ki”.
U la ong ba ki don shibun kiwei pat ki skul kiba don ka mar haduh lai ngut ki nonghikai kat kum ka enrollment jong ka jingdon ki khynnah. Hynrei hadien ba la weng kam їa ki nonghikai kontrak, kitei ki skul ki don satang iwei I nonghikai haduh ba ki shem shitom ban hikai.
U la ong ruh ba ka jingweng kam jong ka sorkar їa ki nonghikai, kam don jingїapher ei ei ruh na ka jingpynїap dusmon jong kito ki kynthei kiba bret їa ki khunlung ba dang kha, namar їa ki la thung da ka sorkar hynrei mynta la pynduh kam da ka sorkar.
