Guwahati, Risaw 08 : Hadien ka jingwad bad ki kam aijingiarap kiba la neh bun bun sngi na ka bynta ki lanot kiba la ngat ha ka jingtwa jong u lumthah ha Uttarakhand, ki kynhun kila lapdien ia ka met iap jong ka nong Assam ka Deepshikha Hazarika.
Kane ka nongkiew lum napoh Assam kala jah rngai noh naduh ka 4 tarik mynta u bnai na ki bynta jong u lum Mount Draupadi Ka Danda-II hapoh Uttarakhand.
Kila don haduh kumba 29 ngut ki briew kiba la sahkut hapoh u lum thah ha ka por ba la pynlong ia ka prokram aijinghikai da ka Nehru Institute of Mountaineering.Kane ka kynhun ka dang wanphai na kliar jong une u lum hadien ba kane ka jingtwa kala syllad ia ki bad pynlong ba kin jah rngai.
Na ka liang kiba haiing hasem jong kane ka nongkiew lum kila wan poi ha Uttarakhand bad ia ka metiap jong ka yn pynkynriah noh sha Assam hadien ba la pyndep ia ka jingleh postmortem.
Kane ka jingwad ia kiwei pat ki dkhot kiba dang jah rngai ha kane ka jingjia ka dang iai bteng haduh mynta.Haduh mynta hi ki don sa laingut kiba dang jah rngai bad la suba jur ruh ba kila khlad noh ha katei ka jingjia.
Ka Deepshikha Hazarika ka dei napoh Rajgarh ha ka nongbah Guwahati ka Assam bad ka dei ruh ka khun jong u Golap Hazarika.
Hadien ba la jia katei ka jingtwa jong u lum thah, na ka liang ka NIM kala pynpaw da kaba ong; “Katei ka kynhun kala wan poi ha Base Cap ha ka 25 tarik u Nailur ba la dep.Katkum ka por aijinghikai ba la buh ka dei ha ka 4 tarik mynta u bnai, kane ka kynhun kala shim bynta ha kaba kiew sha ki bynta ba shalor jong u lum Draupadi Ka Danda-II, kata ha ka kynjang kaba (5670m) ha ka por 4.00 mynstep, hynrei katba ki dang wanphai kane ka kynhun kala ngat ha ka jingtwa jong u thah sha ki bynta ba shalor jong ka camp 1 kaba la pynlong ruh ia ki 34 ngut ki nongshah hikai bad 7 ngut ki nonghikai ba kin ngat ha kane ka jingtwa ha ka por 8: 45 mynstep.
