Aizawl, Naiwieng 18 : Na ka liang ka National Green Tribunal ka la ujor da ka suo-moto case halor ka jingjia twa khyndew hapoh ka par maw kaba la jia hapoh Hnahthial district ka Mizoram kaba la shim ruh ia ka jingim jong ki 11 ngut ki briew haduh mynta.
Na ka liang ka NGT kala hukum ruh ia ki bor pyniaid ba kin wan mih hakhmat jong ka ha ka 28 tarik mynta u bnai.Katkum ka jingpyntip ba la pynmih ha ka sngi Balang ba la lah, ki don hynniew ngut ki heh sorkar ba dei khmih kiba la shah khot hajir shapoh Faridkot House office ha Delhi.Kine kiba la shah khot hajir ki kynthup ruh ia u Member Secretary ka Mizoram Pollution Control Board, u Director ka disaster management directorate ka jylla bad ki nong pyniaid jong ka ABCI Infrastructures Private Limited nalor kiwei pat.
Lah ban kdew ba ka ABCI Infrastructures Private Limited ka dei ka kompeni kaba long trai ia ka par tih maw kaba kala shim wai.Kum ban shu pynkynmaw ba ka jingdon jong kiba iap na katei ka jingtwa hapoh katei ka par maw kala kiew sha ka 11 ngut baroh kumba la pynpaw da ki bor sorkar.
Na ka liang u Deputy Commissioner ka Hnahthial, Mizoram u R. Lalremsanga haba iakren bad ki lad pathai khubor ula ong ba ia ka metiap jong uwei pat u nongtrei par 25 snem rta la lapdien na katei ka jaka ha ka sngi Balang ba la lah.Ia une u briew la ithuh kum u nongshong shnong uba dei napoh Lunglei district ka Mizoram.
Utei u DC ula pynthikna ruh ba 11 napdeng ki 12 ngut kiba jah rngai la lapdien.Baroh kine ki lanot ki dei kiba hapdeng ka rta 18 haduh 49 snem rta.Ka jingwad ia uwei pat uba dang jah rngai ka dang iai bteng khlem sangeh.Une u briew uba dang jah rngai la ong ba u dei napoh Assam.
Kum ban shu kdew ba haduh kumba 12 ngut ki nongtrei par kiba trei bad ka kompeni ABCI bad kiwei pat ki kompeni kila shah tep im hadien ba ka jingtwa khyndew hapoh ka par maw ha ka 14 tarik mynta u bnai hapoh Maudarh kumba 23 kilomitar na ka sor rit Hnahthial.
Na ka liang ki bor district kila pynpaw ba kane ka jingjia kala jia ha ka por kumba 2.40 mynsgi ha ka por ba ki nongtrei ki dang don ha katei ka jaka trei.
Watla baroh ki don 13 ngut ki nongtrei ha katei ka jaka ha ka por ba katei ka jingtwa ka la jia, hynrei uwei napdeng jong ki ula lait phet da ka said.
Katkum ki bor district la ong ba kitei ki lanot kiba la khlad ha katei ka jingjia 5 ngut ki dei na West Bengal, 2 na Jharkhand, 2 Assam, bat mar wei na Mizoram bad Tripura.
Na ka liang ki sakhi kila ong ba kine ki nongtrei kila tih jylliew palat bad kaba la buh jingma ia kane ka jaka tylliat maw bad kaba la pynlong ia u lum baroh uwei ba un twa bad pynjah rngai ia kine ki nongtrei.
