Guwahati, Jymmang 18 : U Myntri Rangbah ka Assam Himanta Biswa Sarma hynne ka sngi Palei, ula pyntip ba ka Sorkar Jylla ka long kaba kloi ban aiti ia ka jingtohkit halor ka jingiap ba phyla jong ka Sub Inspector Junmoni Rabha sha ka Central Bureau of Investigation (CBI).
Haba kren sha ki lad pathai khubor, u Himanta ula ong “Lada ia ka jingtohkit ka CID halor ka jingiap ka Junmoni ka long ka bym ai jinghun ia ki bahaiing hasem, nga long uba kloi ban aiti ia ka jingtohkit sha ka CBI”.
U Himanta ula ong b aka jingtohkit bala pynlong da ka CID jong ka Tnad Pulit halor ka jingiap ka Junmoni kala iaid ha ka lynti kaba dei.
Ha kawei pat ka liang, u Director General of Police (DGP) ka Assam GP Singh ula ong ba ka Tnad kala aiti laitluid ia ka CID ban tohkit ia ka jingiap jong kane ka Pulit Sun-Inspector.
U Singh u pyntip ba ia ka jingtohkit yn leh janai bha da ka CID khlem da ieh ia kano kano ka bynta bad ka Tnad kala ai ia ka jinglong laitluid ia ka kynhun ba kan tohkit.
Kat kum ka khubor, u nongniah trok, uba donkti ha ka jingiatakhuh kali bad ka Junmoni Rabha, ula wan ban pyndem ialade hapoh ka Jakhalabanda Police Station. Ia une u nongniah trok la tip kyrteng da u Sumit Kumar.
Kat kum ka kaiphod Post Mortem, la shem ia bun ki dak mong ha kiba bun ki bynta jong ka met ka Junmoni. La pynpaw ruh ba ki don ki dong mynsaw ha baroh artylli ki khohsiew, ki kjat, ka tymbuit bad ki kti.
Kat kum ka khubor, ia u nongsakhi halor kane ka jingjia takhuh kali, u Pranab Das la synran sha Nagaon Police Station ha ka janmiet 18 tarik Jymmang na Guwahati hapdeng ka jingpahara kaba jur bha.
