Shillong Nailar 03: U Myntri ka pule puthi u Bah Lahkmen Rymbui hynne ka sngi,u la ong ba ka sorkar jylla kam lah ban pynkylla iaka polisi treikam ka jong ka ha kaba iadei bad ka jingthungkam ia ki nonghikai.
U Bah Rymbui u la kren ia katei ha kaba iadei bad ka jingiakhih jong ki nonghikai kontrak hapoh ka lama jongka Meghalaya Lower Primary School Contractual Association (MLPSCA) halor ka jingbym treh ka sorkar ban pynthymmai iaka jingthungkam iaki nonghikai.
U la ong, naduh u snem 2011, kala don ka jingthungkam da kaba leh iaka stop-gap arrangement ne ka jingpynbeit kaba shipor na ka bynta 59 sngi bad la dei ruh ban pynthymmai noh.
Ka sorkar jylla ha u snem 2017 kala shim iaka rai ban pynlong iaka Meghalaya Teachers Eligibility Test (MTET) na ka bynta ban thungkam ia ki nonghikai da kaba bud ryntih ia ki kyndon jongka NCTE bad dei halor kane ba ki nonghikai kontrak kila leit iakynduh ia u bunsien ha u snem 2018 – 2019.
“Ka nongrim ka jong ka sorkar ka long kaba shai kdar ba ka polisi treikam kaba la don lypa, yn ym lah ban pynkylla iaka” ong u Bah Rymbui ha kaba iadei bad ka jingdawa ban thungkam biang ia ki nonghikai kontrak.
U la iathuh, ba ka sorkar kan ialeh ban shimkhia iaka jingpynsngew jong ki nonghikai kontrak ha kaba iadei bad ka rta ka jongki.
“Ka tnad ka pule puthi kadei kaba nyngkong ban pynsngew sha ka sorkar jylla ban pynjlan iaka rta na ka 32 snem shaka 37 snem ka rta naka bynta ki Schedule Tribe. Ym tang katta, ngi la don ruh ia ki kyndon ban pynjlan iaka rta naka bynta kito kiba la don lypa haka kam, katta haduh 40 snem ka rta” ong u Bah Rymbui.
U la ong, bun kila lah ban pyndep iaka eksamin MTET bad la thungkam pura syndon ia kitei ki nonghikai.
“Kumba la bthah da ka DSC ne MPSC, kitei ki nongthep kam kila ioh ia ka kam bad kito kiba trei da ka kontrak ne leit hikai shipor haka jaka kiwei la pynkut noh. Kaei kaba ngi lah ban leh ngi lah dep ban leh hynrei palat ia kane ngim lah shuh ban leh eiei” ong u Myntri ka pule puthi.
U Bah Rymbui u la pyntip ruh ba ka jingthungkam ia ki kam kiba lait la dei ban pyndep ha u bnai ïaiong hynrei ym shim la lah ban iaid shakhmat namar ka jingpynmih hukum jong ka iingkashari ba ka jingthungkam kadei ban iaid da ka Roster System.
“Ngi kyrmen skhem ba ha ka por kaba biang ngin lah ban pyndep bad ngin lah ruh ban pynmih ia ki jingpynbna paidbah bad ban ioh ban thungkam pura noh” ong u Bah Rymbui.
Ha kaba iadei bad ka jingbym don ki nonghikai ha kiba bun tylli ki skul namar ka jingbym thungkam, u Myntri u la ong, “Katei ka mat ka long kaba long kyllain bha bad ym lah ban shu pynkylla khongpong ia ka por ka samoi. Ngi hap ban iaid shakhmat bad nga ngeit skhem ba ia katei ka mat yn sa lah ban pynbeit noh mardor”.
