Shillong, Naiwieng 10: Ki Arngut ki nongialam jong ka Federation of Khasi Jaintia and Garo Peoples (FKJGP) hynne ka sngi, kila shah khot hajir bad shah kylli jingkylli haduh 8 kynta ha ki pulit ka nongbah Shillong.
Kine ki ar ngut ki nongialam kiba la shah khot hajir ki kynthup ia u Vice President ka FKJGP u Bah Kitboklang Nongphlang bad u Organising Secretary u Khrawkupar Nongsiej ha kaba iadei bad ka jingshah shoh bad jingshah pynjulor ki kali jong ki riewpaidbah haka 28 tarik u Risaw haka jingpynlong ka FKJGP iaka Unemployment Rally ha nongbah Shillong.
“Ngi la wan naduh ka por 12 baje mynsngi bad ngi dang lait mynta haka por 8 baje mynmiet, ngim sngeweiei hynrei nangne shakhmat kim dei ban pyndik ban khot biang ia kiwei pat ki dkhot ne ban thwet iaki hynrei ka sorkar kadei ban shimkhia noh mardor ha kaba iadei bad ka jingbym iohkam iohjam ki samla” ” ong u Khrawkupar Nongsiej.
“Ka Laitumkhrah Police Station kala pynngat ia ngi 6 tylli ki kyndon bad ka Sadar Police Station ruh kala pynngat ia ngi 6 tylli ki kyndon bad ka seng ka phah iaka khubor sha ki dkhot ba kim dei ban duh mynsiem watla ki nongialam ki iai shah khot hajir bad kane kan ym theh umpjah iaka mynsiem ialeh ka jong ngi hynrei ngin iai dawa naka bynta ki ishu bapher bapher kiba ktah khamtam eh ia ki samla jong ngi” ong u Khrawkupar.
“Kine ki jingjia kidei kiba la ju jia hi na ka por sha ka por bad ngim sngewphylla shuh bad kum ki nongialam ngi la ju mad ia kum kine ki jingjia na ka por sha ka por bad kine kiei kiei kiba la jia kin nang pynphrang bad pynskuin shuh shuh iaka mynsiem jong ngi ban shakri khambha iaka jaidbynriew nangne shakhmat” ong u Bah Kitboklang.
Ula ong, kane ka jingshah khot hajir jong ki nongialam kan nang pynrhem shuh shuh ia ka ding jong ka mynsiem ialeh jong ki khun samla ka jaidbynriew khamtam iaki dkhot ka seng bad ia ki nongialam bad kin trei shitom shuh shuh ban pyntyllun ia ki ishu jong ka jaidbynriew nangne shakhmat haduh ba ka sorkar kan pynurlong ia ki mat jingdawa.
“Hapdeng ka jingshah theh um pjah bad ka jingshah kem ki dkhot ka seng, ka jingshah khot hajir, hynrei kum ka seng ngi iengskhem beit ha ka nongrim ban gin dawa beit na ka sorkar bad katba ngim pat ioh ia kine ki jingdawa bad katba ka sorkar kam pat shimkhia, ngin iai pynrhem shuh shuh iaka jingialeh ka jong ngi da kiwei pat ki lynti bapher bapher” la ong u Bah Kitboklang.
Ula ong ruh ba ki pulit tangba ki don ha ka bor kam long ba kin shu leh katba mon bad dei na kane ka daw ba ka seng kala dawa ban don iaka State Youth Commission khnang ba ki samla kiba shah pynjynjar ne shah khot hajir ha ki bor jong ka aiñ kin ioh ban pynsngew ha ki bor kiba dei khmih.
“Lada ki ong ba ki samla kidei ka lawei jong ka ri bad ka jaidbynriew bad ka pyrthei hi baroh kawei, hynrei ym iohi pat ban don kata ka Commision kaba kyrpang naka bynta ka jingeh jongki samla” la pynkut u nongialam ka FKJGP.
