Shillong, Nailar 27 : U Myntri ka Koit ka Khiah Bah Wailadmiki Shylla ha ka sngi Palei ula pyntip ha Iingdorbar Thaw Ain ba ka Tura Medical College bad Hospital kam pat lah ban ai ia ka sngi kaba thikna ban sdang noh ia ka jingshim klas ia ka batch na nyngkong ka MBBS namar ka jingduna bun ki nonghikai, watla 83% ki jingtei kila dep pura.
U Bah Wailad ula buh ia ka jubab da ka jingthoh haba iadei bad ka call attention notice hapoh ka Rule 54(1) bala wanrah da ka MLA ka NPP na Gambegre Dr Mehtab Chandee A Sangma, kaba la pan ia ki jingtip ba bniah halor ki jinglong jingman ki jingtei, ka jingthungkam nonghikai, ka jinglong ba khreh jong ka hospital, ka jingpynbeit ia ki nongpyniaid bad ka por ban sdang ia ka samoi pule 2027-28.
U Myntri ula pyntip ba ia ka project ka mang ha u snem mang tyngka 2017-18 ba kot T.189 klur- kaba kynthup ia T.170.10 klur ka bhah na ka Sorkar Pdeng bad T.19 klur ka bhah na Jylla-hapoh ka skhim ban seng ia ki medical college ba thymmai kiba donlang bad ki district hospital.
I aka MoU bad ka TCIL la iasoi ha u Nohprah 2014 ban tei ia ka college ba 100 seat ha ka jingmang pynlut ba T.234 klur, da ka jingmynjur ka Jylla ban pyndap ia ka pisa kaba sah.
U ong ba ka jingwad ia ka jaka kaba biang kala pynslem ia ka project da ki snem. Ka jingthmu haba sdang ban kyntiew kyrdan ia ka Tura Civil Hospital kala pulom namar ka jingkyntur pud. Ka jaka ha Balagre la shem ba kam long kaba biang namar ka jngai kumba 17 Km na ka hospital, kaba pynkhein ia ka kyndon ka NMC ba long 10 km. Khatduh, la ithuh ia ka jaka ha Doldegre ha u snem 2017 bad ka jingbit ban pom ia ki dieng kala wan ha ka 22 tarik Kyllalyngkot, 2019.
Ka project kala shah ktah pat sa da ka jingiakhih CAA-NRC ha u Nohprah 2019 bad ka Covid-19 ha u Lber 2020, ula ong.
Kat kum ka kaiphod ba mynta, ka academic block kala dep haduh 80%, ka hostel ki shynrang bad kynthei kala dep 78%, ka Type-5 quarter bad ka jaka sah u Deam kala kot 99%, katba ka quarter ki nongtrei kaba dei ka Type-2 bad Type-3 kila kot 50% bad ka Type-4 kala kot 40%. Ka Electrical Substation kala dep 85%.
Na ka bynta ka hospital block ba thymmai, ka block ba 80 jingthiah kala dep 40% badka block ba 150 jingthiah kala dep 25%. Ka teaching hospital ba don mynta ka don ia 200 jingthiah ha Tura Civil Hospital bad 50 jingthiah ha Tura MCH Hospital, n aka 220 jingthiah kat kum ki kyndon ka NMC n aka bynta ki 50 tylli ki seat pule MBBS.
Halor ka jingthungkam, u Bah Wailad ula ong ba ka Manpower Assessment Committee bala khlieh da ka Joint Secretary Dr Rezina Ch Marak la thung ha ka 21 tarik Nailar 2025. Halor ki jingai jingmut jong ka, lah thaw ia 59 tylli ki kam contract.
“Lai sien la pynmih ia ka jingpynbna laitkam ha ki san tylli ki kot khubor national bad 3 tylli kiba na Jylla” ong u Bah Wailad haba bynrap ba la pynlong ruh ia ka jingiasyllok bad ki doktor kiba dang shakri ha ka kam ha ri-lum Garo.
U ong ba ba wat hapdeng kane, ka jingdon ki nonghikai ka dang duna bha.
“Na ka bynta ka college ba 50 seat, ka kyndon NMC ka buh ia 97 ngut ki nonghikai. Ka Tyra ka don tang 40-3 ki professor n aka 14, 3 ki Associate Professor na ka 20, 16 ki Assistant Professor na ka 25, 10 ki Tutors naka 15 bad 8 ki Senior Residents na ka 23- kaba buh ia ka jingduna ba kot 57 baroh lang.
Haba phai pat sha ka Shillong Medical College, kane ka College kaba 50 seat ka don haduh 83 ngut ki nonghikai ha ka por ba wan jubor ka NMC bad 84 kat haduh ka 24 tarik Nailar, 2026 na ka 97 ngut kiba donkam.
