Shillong Jymmang 20: U Myntri Rangbah ka jylla u Conrad K Sangma, hynne ka sngi Baar, ula iashimbynta ha ka SPARK Summit 2025 kaba la long ha Soso Tham Auditorium, Shillong.
Ka SPARK ka mut ‘School Programs in Articulation, Resilience and Kindness’ kadei ka sienjam kaba la shim da ka sorkar jylla da ka jingthmu ban pynkup bor ia ki khynnah pule ha kaba iadei bad ka sap ban pyntbit khamtam eh ha kaban pynleit jingmut ha kaba iadei bad ka jingiakren bad jingpyniadei bad kiwei pat, ban long kiba skhem jingmut bad kiba don ia ka jingsngewthuh bad ban sam lem sha kiwei pat.
Kadei shi bynta jong ka National Education Policy (NEP) bad kadei ruh kaba la ioh jingithuh kum ka prokram kaba seisoh kaba la pyntreikam da ka Education Ministry. Ia kane ka prokram la pyntreikam da ka AVENUES, ka kynhun kaba ai jinghikai bad la kyrshan pat da ka Samagra Shiksha hapoh jong ka tnad pule puthi.
Haba kren ha ka jingialang u Myntri Rangbah u Conrad K Sangma, ula ong ba ki bunbah na ki paidbah ki pyrkhat ba ka sorkar ka treikam halor ki skhim bad ki prokram hynrei haba ai jingpynshai halor ka buit treikam jong ka sorkar jylla, ula pyntip ba ki don ki prokram na ka bynta ki tnad bapher bapher bad kidei kiba la pyniasoh na ka bynta ban pynurlong ia ka thong kaba la buh da ka jylla.
Ula ong, kiba bun tam na ki nongshong shnong hapoh ka ri India kidei ki samla kiba haka rta kaba 15-19 snem bad ha Meghalaya kiba bun tam eh ki briew kidei ha ka rta kaba 0-4 snem bad 49 % jong ki nongshong shnong kidei hapoh jong ka 20 snem ka rta.
“Kane kadei ka jingtynjuh kaba shisha hynrei kaba don ruh ia ka lad bad ka prokram kum ka SPARK, Early Childhood Development Program, MPower, MGMP, YES Meghalaya, ki prokram kiba iadei bad ki kam ialehkai, baroh kine kidei ki jingkynshew ban kyntiew ia ki” ula bynrap.
U Myntri Rangbah ula ong “ ban lah ban shimkabu ia ka jinglong jingman kumta ka long kaba donkam ban kynshew ha ki samla ha man la ki bynta jong ka jingim ka jongki.
“Ka Meghalaya kadei kawei na ki jylla kaba pynleit jingmut bha ha kaba iadei bad ka bynta jong ka jingim ha ki rta bapher bapher bad kila don ki prokram bapher bapher kiba iadei bad ka roi ka par jong ki khunlung, ki heprit, ki khynnah bad ki samla bad ka jingkynshew tyngka kaba ngi la leh ha kitei ki prokram kin sa pynmih ia ka jingseisoh ha ki snem kiban wan” ula ong.
Ha kaba phai sha ki samla kiba don hapdeng 9-19 snem, ula ong ba kane kadei ka por, haba ki briew ki mad ia kiba bun ki jingeh bad kine kidei ki rta kiba donkam bha ban ioh ia ka jingbtin lynti bad ula ong ba kiba iatreilang kum ka Avenues kaba iaid shakhmat bad ka prokram kum ka SPARK ban kyrshan, saindur bad iasyllok bad ki khynnah ba kin iaid shaphrang ha ka jingim ha ka lynti kaba dei, ban long kiba tbit bad ki nongshong shnong kiba don ia ka jingkitkhlieh.
U Myntri Rangbah ryngkat bad ki heh ki hain kila sam ruh ia ki Tablet sha ki ki khynnah kiba la wan shakhmat ha ki jingpule bad ia ki syrnod sha ki skul kiba la Iashimbynta ha ka prokram jong ka SPARK.
Ha kane ka jingialang la iadonlang u Myntri ka pule puthi u Rakkam A Sangma, u MLA ka Kharkutta u Rupert M Momin, u Secretary ka tnad pule puthi u Swapnil Tembe, u Director of School Education & Literacy u Bah Banteilang Kharshandi bad kiwei kiwei.
