Guwahati, Naiwieng 07 : Ka jingsakhi ia ki 270 tylli ki case jong ka jingpang dengue tang hapoh ki san sngi hapoh Karbi Anglong district ka Assam kala pynlong ia ki bor sorkar ba kin shim mardor ia ki lad jingiada khnang ban khanglad ia ka jingsaphriang jong kane ka jingpang, ong ka hukum ba la pynmih da ki bor sorkar hynnin ka sngi U Blei.
Ia baroh ki skul sorkar, skul shimet bad ki kolej kiba hap hapoh Diphu Municipal Board bad ki jaka kiba hap hapoh Greater Diphu Town la phah ban khang khyrdep naduh mynta ka sngi Nyngkong haduh ka sngi Saitjain, ong ka hukum bala pynmih da u principal secretary, Karbi Anglong Autonomous Council.
Ka jingthoh ba la pyllait da ka National Health Mission (NHM), Assam kala ong ba napdeng ki 285 tylli ki case jong ka jingpang dengue ba la lapdien ha ka jylla hapdeng ka 1 tarik haduh ka 5 tarik mynta u bnai, haduh 271 tylli ki case ki dei napoh Karbi Anglong district.
Ki 14 tylli kiwei pat ki case kiba sah ki long phra tylli ki case na Kamrup Metropolitan district, katba artylli ki case la rejistar na Nalbari bad mar iwei ha Charaideo, Kamrup (Rural), Nagaon bad Hojai.
