Shillong, Lber 15 : Ka bor district ka East Khasi Hills kala pynmih ia ka jingbthah paidbah ba maham ba ka lah ban don ka jingpom pyrkhat, pom leilieh, hap phria, eriong bad u slap ba jur ha kine ki khyndiat sngi ban wan kat kum ka jingbatai antad (forcast) jong ka India Meteorological Department (IMD).
Kat kum ka jingbthah bala pynmih da ka Ophis ka Deputy Commissioner, ka jingsniew ka suinbneng ka lah ban jur bha hapdeng ka 15 tarik Lber bad 19 tarik Lber ha kylleng ki jaka jong ka District.
Ka jingbatai antad ka pyni ba ha ka 15 tarik Lber, yn sakhi ia ka jingpom pyrkhat uba wan lang bad ka leilieh, u slap ba jur, u phria bad ka lyer kaba jur kaba kot haduh 40-50 kmph ka jingsted, ha ki katto katne ki jaka.
Ha ka 16 tarik Lber, u pyrkhat bad ka leilieh ryngkat ka lyer ba iaid 30-40 kmph bad u slap ba jur, la khmih lynti ban don ha ki katto katne ki jaka.
Ha ka 17 tarik Lber ka IMD kala batai antad ban don ka jingpom pyrthat bad leilieh bad u slap bad ha ka 18 bad 19 tarik pat lah ban mad ia ka jingpom pyrkhat bad leilieh.
Ka bor distriat kala kyntu ia ki nongshongshnong ba kin long phikir bha bad ban shim ia ki lad jingshngain ha kum kane ka por ka bym long thikna ka suinbneng.
La bthah ia ki nongshongshnong ba kin pyndait skhem bha ia ki mar kum ki tin sop iing, ki mawit, ki signboard bad kiwei ki tiar kiba lah ban shah rong ha ka lyer kaba khlain. La bthah ruh ba kin pynlip ia ki tiar electronic ha ka por ba pom leilieh bad kiar ban ieng marjan ki post elektrik lane ki sainar bording.
Ki briew kiba sah marjan ki wah la bthah ba kin husiar bha ia ka jingwan poi kynsan ka umsaw ha ka por ba jur slap. La bthah ia ki briew ba kim dei ban jam ia ki wah , ki nala, ki kshaid namar ki lah ban long ka jingma.
 jong ka India Meteorological Department (IMD).){kind=link}