Shillong, Naitung 17 : Haduh 12 ngut ki koidi kiba don hapdeng 70-80 snem ka rta ki dang don mynta ha ki phatok ha kylleng ka Jylla Meghalaya, la pyntip sha ka Iingkashari ha ka sngi Palei.
Haba shong bishar ia ka mukoduma, ka Division Bench ka Chief Justice Revati Mohite Dere bad Justice W Diengdoh kala pule ia ka kaiphod ia kaei kaba long kaba man kine ki koidi, kaba la aiti da ka Sorkar Jylla lyngba u Additional Advocate General K Khan, haba bud ia ka hukum ba 10 tarik Jylliew.
Kat kum ka kaiphod, la pyntip ba san ngut ki don ha Shillong Jail, uwei ha Nongpoh Jail, uwei ha Jowai Jail, saw ngut ha Tura Jail bad uwei ha Williamnagar Jail.
“Haba shong pyrkhat ia kane, ngi kyntu ia u Khan ba un ai ia ka jingtip kaba bniah halor ki case ba sahteng pyrshah ia kine ki briew…bad kaei kaba kine ki case ki long mynta” ong ka Iingkashari.
Ka IIngkashari kala bthah ruh ia u AAG ba un pyntip “haduh katno kine ki briew kila don ha phatok bad la ki don ne em ia kano kano ka jingpang/ jingduna ha ki dkhot met.
Ka Iingkashari kala pynrung ha ki jingthoh ia ka kaiphod halor ka jingleit jurip ia ka Williamnagar Jail bala aiti da u Amicus Curiae T Yangi B.
Da ka jingpynpaw u Amicus ia ki jingeh shimet, ia kane ka kam la pynjlan shaduh ka 10 tarik Nailar, 2026.
