Nongstoiñ, Naiwieng 16: Ka kynhun ïalehkai jong ka Lamare SC Shillong ka la pynbam haduh 11 kol nod ïa ka kynhun jong ka PSA Guwahati, ha ka jingïalehkai pre quarter final kaba lai jong ka Invitation Knockout Football Tournament, ba la pynïaid da ka New Nongstoiñ Sports Social and Cultural Club.
Ha kane ka jingïalehkai, ki paidbah kiba la leit ban sakhi ïa kane ka jingïalehkai, ki la ïohi ba naduh ba sdang haduh ba kut jong ka jingïalehkai, ka long kaba noh shilliang bha namar ka jingtbit bad jingkhlaiñ bor jong ka Lamare SC, kaba la thep shwa tang 5 kol ha ka kylla step bad pynbud pat sa 6 kol ha ka kylla miet.
Na ka liang ka PSA Guwahati watla ka la pyrshang ban ïalehkai bha katba lah la I bor, hynrei kam lah satia ban tur shakhmat bad bunsien la shu shah knieh suk ïa ka bol ha ki rang ïalehkai ka Lamare SC. Lehse kane kan dei ka nam jop kaba heh tam jong ka lympung, hynrei na ka bynta ka Lamare SC ka jingjop jong ka, ka la pynlong ïa ka ban rung pat ïalade sha ka quarter final.
Na ka liang ki nongpynïaid jong kane ka jingïalehkai ki la jied ïa u samla Pynbha Suting na ka Lamare SC kum u rang ïalehkai ba tbit tam lane player of the match. Ka jingïalekai ka ban bud kan long ha ka 23 tarik mynta u bnai hapdeng ka Ri Bhoi United FC pyrshah ïa ka Naco Imphal jong ka jylla Manipur.
